Kompanııanyń baspasóz qyzmetinen habarlaǵandaı, aldyn ala qorytyndy boıynsha muzdatqysh sılındri artyndaǵy rezeńke tósemsheniń zaýyttyq aqaýyna baılanysty 500 g ammıak syrtqa tógilgen. Dereý oqıǵa ornyna qadaǵalaý qyzmetteri men ekologııalyq saraptama júrgizýshi mamandar shaqyrylǵan.
«Qazirgi ýaqytta anyqtalǵan tehnıkalyq aqaý tolyǵymen joıyldy. Jabdyq 1 maýsymda ǵana tekserilip, kýálandyrýdan ótken edi. Aqaýdyń shyǵý sebebi túpkilikti anyqtalǵan soń, kompanııa resmı jetkizýshilerge habarlasady. Bizdegi jabdyqtar men olardyń qosalqy bólshekteri resmı jetkizýshilerden satyp alynǵan jáne qajetti sáıkestik sertıfıkattary bar», delinedi kompanııanyń habarlamasynda.
Sondaı-aq kompanııa kásiporynǵa tekserý júrgizetin qadaǵalaý organdaryna jan-jaqty kómek kórsetetinin málim etti.
«Qadaǵalaý organdary tıisti qorytyndy shyǵarady. Barlyq qosymsha aqparat memlekettik organdardyń resmı qorytyndysyn alǵan soń habarlanady. Aıta keteıik, oqıǵa bolǵan kúngi aýysymda óndirilgen ónimder satylymǵa shyqqan joq», dep habarlady kompanııa.
Eske salaıyq, Almatydaǵy «Shın-Laın» kompanııasynyń sehynda tógilgen ammıaktan bes adam ýlanyp, aýrýhanaǵa túsken edi.
