Bul eshqandaı mıf emes, sımvoldyq sıpaty da joq, qoǵamda beleń alǵan qandy oqıǵanyń jelisimen jazylǵan shyǵarma. «Mıokard ınfarkti». Sozylmaly syrqattyń ataýymen atalǵan týyndy dramalyq sıpatqa ıe. Avtory – mıfoshyǵarmalardyń jankúıeri, sýretshi Baqyt Bápishov.
Baqsańyz, kenep betinde tik formatta tas balbal kóldeneńinen sulap jatyr. 1986 jylǵy qaıǵyly jaǵdaı sýretshiniń júreginen osylaı ótedi. Balbal fonynda shyǵystyq mánerde ósimdik tektes oıýlarmen órnektelgen kilem ilingen. Kilem qyzǵysh sary tústen kúreń qyzyl túske deıin qubylady. Qaýipti naýqas balbaltas pishinde tuspaldanyp berilgen. Alaıda kúńirenip túıgen qabaǵy oqyrmanǵa aıqyn kórinedi. Balbal baba tastan jaralǵan júrek tusyn qushaqtap qyrynan jatyr. Onyń ústine kepterge uqsas qus qonaqtaǵan. Qustyń kóleńkesi erekshe aıshyqtalyp qoıý qara túste kilem betine túsken. Ol da bulyńǵyr.
Aldyńǵy shepke qustyń ózinen buryn kóleńkesi basymdyq tanyta shyǵyp tur. Bul kóleńke shyǵarmanyń dramalyq kúshin odan beter kúsheıte túsedi. Qulap túsken balbaldyń kóleńkesi joq, bul onyń dúnıeden jyraq ekenin ańdatady. Kompozısııa aıaqsyz qalǵandaı áser beredi. О́ıtkeni kenepte beınelengen kilem formattyń sol jaq tusynda bitpeı qalyp short kesilgen bolsa, sulap jatqan balbal tas keneptiń oń jaq tusynda jambasynan tómen qaraı short kesilip aıaqsyz qalǵan.
Qylqalam sheberi dramaǵa toly qaıǵyly kezeńge sebepshi bolǵan oqıǵaǵa qaterli aýrýdyń dıagnozyn qoıyp, ony balbalmen beıneleı otyryp, búgingi qoǵamnyń baba murasynan tamyrymen ajyrap bara jatqanyn baıandaıdy. Sol arqyly 1986 jyly ultym dep qan tókken bozdaqtardyń rýhy ultsyzdardyń tabanynda taptalǵanyna nazdana kóńil aıtady. Sýretker qasiretti shaqtyń keskinin osylaı baǵamdaıdy.
