Burynǵydaı emes, qazir balalar úshin úıirmeniń, sporttyq seksııalardyń sandaǵan túri bar. Balanyń ıkemine qaraı ıtermelep, baǵyt-baǵdaryn berip otyrsańyz bolǵany.
Aıta ketsek, oblysta ótip jatqan bul jolǵy jarystyń bir ereksheligi, jekpe-jek tuńǵysh ret tabıǵat aıasynda, Buqtyrmanyń jaǵasynda ótti. Jattyqtyrýshylardyń aıtýynsha, jarys kópshiliktiń kóńilinen shyqty. Balalar da úlken daıyndyqpen kelgen.
– Jekpe-jek Buqtyrma jaǵasynda, «Saıahat» demalys bazasynda uıymdastyryldy. Balalar judyryqtasyp qana qaıtqan joq, sý jaǵasynda demalyp, sergip qaldy. Ata-analar da rıza. Saıysty uıymdastyrýda qoldaý kórsetken aýdan basshylyǵyna, kásipkerlerge alǵys aıtamyn, – dedi jarysty uıymdastyrýshy ári Altaıdyń «Arlan» jekpe-jek komandasynyń jattyqtyrýshysy Dáýren Shomatov.
Sharshy alańǵa shyqqan balalardyń basym bóligi jarys mádenıetin, jarys tártibin qatań saqtady. Jeńiske jetkenderi qarsylastaryna syılastyqtaryn bildirip, qushaqtaryna qysyp jatty. Jekpe-jekte Rıdderden, Semeıden, Úrjardan, Kókpektiden, Samardan, О́skemennen jáne Altaıdan kelgen sportshylar óner kórsetti. Eń bastysy, eshkim jaraqat alǵan joq.
– Jekpe-jek janyma jaqyn sport. Tóbelesý úshin emes, tóbelespeý úshin jattyǵamyn. О́ıtkeni jattyqtyrýshym Jasulan Bekbolatuly kúshterińdi jarysta ǵana kórsetińder dep únemi aıtady. Búgingi jarysta jeńiske jettim, – deıdi óskemendik «Namys» komandasynyń jas sportshysy Álıhan Bolat.
Álıhan Bolat 4-synypta oqyǵanymen, soqqysy joıqyn. Osy ýaqytqa deıingi qatysqan jarystarynda qarsylas shaq keltirmegen. Aldaǵy ýaqytta ótetin halyqaralyq jarysqa daıyndalyp júr. Iá, jekpe-jek erkelikti, erinshektikti kótermeıtin sport. Sondyqtan da sportshylar jas ta bolsa, únemi daıyndyqta júrýleri tıis. Eńbektense ǵana jetistikke jetedi. Búgingi jeńiske jetken sportshylar tabandy jattyǵýdyń, boıdaǵy rýhtyń arqasynda jeńis tuǵyrynan kórindi.
