Belgili rejısser Abdýlla Qarsaqbaev týraly fılm kórsetiledi

ASTANA. 25 sáýir. Qazaq kınosy tarıhyndaǵy iri tulǵa, belgili rejısser Abdýlla Qarsaqbaevtyń ómiri men qyzmeti jónindegi fılm kórermenge usynylady. Bul týraly «Ekspress K» habarlady. Eńbekteri ulttyq kınomyzdyń altyn qorynan oıyp oryn alǵan Abdýlla Qarsaqbaevty talaılar qazaq kınematografııasynyń ákesi dep sanaıdy. Ol Almaty oblysy Jambyl aýdanynda týǵan. Uly Otan soǵysy jyldarynda elmen birge kóptegen qıynshylyqtardy basynan ótkeredi. Talapty jas 1950 jyly Búkilodaqtyq kınematografııa ınstıtýtyna oqýǵa túsedi. Qazirgi kezde Abdýlla Qarsaqbaevtyń túsirgen fılmderi jurtshylyqqa keńinen tanys. Árıne, bul jóninde shaǵyn aqparatqa bárin syıdyryp aıtý múmkin emes. Ol alǵashqy jumysyn derekti fılmder túsirýden bastaǵanyn bireý bilse, bireý bilmeıdi. A.Qarsaqbaevtyń «Qazaq halqynyń qolóneri» atty derekti fılmi kezinde Kanadada ótken baıqaýda arnaıy syılyqqa ıe bolypty. Atalǵan shyǵarmany 40-tan astam el asqan qyzyǵýshylyqpen satyp alǵanyn da aıta keteıik. Búginde Abdýlla Qarsaqbaevtyń isin uly Toqtar jalǵastyrýda. Toqtar Qarsaqbaev joǵaryda aıtyp ótkenimizdeı, ákesi jóninde derekti fılm túsirdi. Ol bul eńbeginde ákesiniń rejısserlik qyzmeti men ustazdyq qasıetin molyraq qamtyǵan. Sondaı-aq, aıtýly tulǵa týraly zamandastarynyń tolǵaǵa estelikteri de fılmge arqaý bolǵan. Joldybaı Bazar. Derekkóz: «Ekspress K». Foto: Qaznews.kz.