Zań qarjylyq pıramıdalardy jarnamalaýǵa tartylǵan adamdardyń jaýapkershilik dárejesin anyqtaýǵa, arajigin ajyratýǵa jáne jasalǵan quqyq buzýshylyqqa mólsherles jaýaptylyqqa tartýǵa múmkindik beredi.
Qujattyń maqsaty – qarjylyq pıramıdany qurǵany jáne oǵan basshylyq jasaǵany úshin jaýaptylyqty kúsheıtý, sondaı-aq azamattardy qarjylyq pıramıdaǵa tartýǵa alyp kelgen aqparatty taratqany úshin qylmystyq jaýaptylyqty zańnamalyq retteýdi qamtamasyz etý.
Zań jobasymen Qylmystyq, Qylmystyq-prosestik kodeksterine ózgerister men tolyqtyrýlar engizildi.
Zań jobasynyń negizgi mindetteri:
- Qarjylyq (ınvestısııalyq) pıramıdalardy qurǵany jáne olarǵa basshylyq jasaǵany úshin jazany qatańdatý;
- Qarjylyq (ınvestısııalyq) pıramıda aqparatyn aıtarlyqtaı zalal keltire otyryp, oǵan adamdardy tartýǵa alyp kelgen jeke jáne tikeleı taratqany úshin, onyń ishinde elektrondyq aqparattyq resýrstar arqyly taratqany úshin qylmystyq jaýaptylyqty engizý;
- Qarjylyq (ınvestısııalyq) pıramıdalardy jarnamalaǵany úshin tergeýge jatatyndyǵyn aıqyndaý.
Sondaı-aq palata depýtattary «Qazaqstan Respýblıkasynyń Ákimshilik quqyq buzýshylyq týraly kodeksine qarjylyq (ınvestısııalyq) pıramıdalardyń qyzmetine qarsy is-qımyl máseleleri boıynsha tolyqtyrý engizý týraly» ilespe zań jobasyn da qabyldady.
Senat tóraǵasy Máýlen Áshimbaev qazirgi tańda qarjy pıramıdalary qoǵamdaǵy eń ózekti problemalardyń biri ekenin jáne qarjy alaıaqtyǵymen kúresý maqsatynda qoldanystaǵy zańnamany jetildirýdiń mańyzy zor ekenin aıtty.
«Qabyldanǵan zańdarda qarjy pıramıdalarynyń jarnamasyn qylmys dep taný jáne olardy quryp, basqarǵany úshin jaýapkershilikti kúsheıtý kózdelgen. Bul zańdar azamattardy zańsyz qarjy jáne ınvestısııa jobalaryna tartýdan qorǵaýdy kúsheıtedi. Sondaı-aq jańa normalar qarjy pıramıdalarynan zardap shekken azamattar arasyndaǵy áleýmettik shıelenisti tómendetedi dep senemiz», dedi Máýlen Áshimbaev.
