Qalalyq arhıvke 60-qa jýyq is, myńǵa tarta qundy qujat tapsyryldy. Bir áýlettiń balalary ata-babalarynan qalǵan jádigerlerdi muraǵatqa ótkizip, qazaq rýhanııatyna óz úlesin qosty.
Sharaǵa jınalǵan qaýym jyly lebizin bildirdi. Alǵashqy sóz kezegi oblystyq analar keńesiniń tóraıymy Jamal Qasymbekovaǵa berildi.
«Andas áýletiniń qory» mıllıardtan asa halqy bar Qytaı memleketindegi qazaq qandastarymyzdyń tarıhyn bilýimizge úlken kómek. Memleket basshysy Qasym-Jomart Toqaevtyń kitabyn oqyp otyryp, osy Qytaı memleketi týraly kóp nárseni bilgenmin. Olardyń qandaı halyq ekenin, ádet-ǵurpyn degendeı... Sondyqtan áýlettiń ıgi isi kópke úlgi», dedi J.Qasymbekova.
«Andas áýleti» halyq shyǵarmashylyǵyn, qazaq folkloryn zerttep, ata murasyn ardaqtap, ulttyq ónerdi jalǵastyryp keledi. Búginde 7 bala, 16 nemere-jıen tárbıelep otyr. Andastan taraǵan urpaqtar ata-babalarynyń bes ǵasyr boıy tutynǵan 700-den astam jádigerin saqtap, muqııat zerdelegen. Onyń bir bóligin Kúnes aýdandyq murajaıyna saqtaýǵa tapsyrsa, 100-ge jýyǵyn «Atameken» mádenı ortalyǵynyń qoryna ótkizgen.
«Máselen Qytaıda ár otbasynyń ózindik arhıvi bolady. Bizde de sol nárse qalyptasý kerek. Shetelde bul dástúr jalǵasqan. Al ol nesimen qundy degende, sondaǵy arhıv sanymen jáne qujattarymen baǵaly. Mysaly, bir japyraq qundy qaǵazdy jumarlap tastaı salsańyz qoqys, jınap qoısańyz múlik, al arhıvke ótkizseńiz ol memleket menshigine aınalyp, qundy qujat bolmaq», dedi Andas áýletiniń bir múshesi, jýrnalıst Qajet Andas.
Búginde atalǵan otbasynyń ónegesin áýlettiń nemere-jıenderi jalǵastyrýda.
