«Adam kapıtalyn damytý isinde bilim salasy negizgi ról atqarady. Biz jýyrda Bilim jáne ǵylym mınıstrligin ekige bóldik. Bul qadam qordalanǵan máselelerdi sheshý úshin qajet boldy. Úkimet jáne jańa mınıstrlikterdiń basshylary otandyq bilim jáne ǵylym salasyn tyń serpinmen damytýǵa kúsh salady dep senemin», dedi Memleket basshysy Úkimettiń keńeıtilgen otyrysynda.
Sondaı-aq Prezıdent sońǵy jyldary mektep qabyrǵasynda zorlyq-zombylyqtyń kóbeıip ketkenine alańdaýly ekenin jetkizdi.
«Men osy jyldy Balalar jyly dep jarııaladym. Biraq, sońǵy jyldary mektep qabyrǵasynda zorlyq-zombylyqtyń kóbeıip ketkeni alańdatady. Onyń ústine, tolyq jabdyqtalǵan mektepterdiń 65 paıyzynda, ıaǵnı 3 myń mektepte beınebaqylaý júıesi talapqa saı emes, keıde múldem jumys istemeıdi. Jalpy, elimiz boıynsha balalar men jasóspirimderdiń óz-ózine qol salýy, ıaǵnı sýısıd azaıdy. Degenmen, Almaty, Jambyl, Qostanaı jáne Mańǵystaý oblystarynda mundaı oqıǵalar kóbeıip barady. Balalardy zorlyq-zombylyqtan qorǵaýǵa, sýısıdtiń aldyn alýǵa, árbir balanyń quqyqtaryn qamtamasyz etýge arnalǵan keshendi jospar qajet», dedi Qasym-Jomart Toqaev.
