Bilim ordasy basshysynyń bul áreketi ata-analardyń ashýyn týǵyzǵan. Bir aıdan soń jańa oqý jyly bastalady. Mektepishilik is-sharalarda kún tóbeden tóngende oqýshylar osy qıylǵan aǵashtardy saıalaıdy eken. Ári bilim shańyraǵynyń kórkindeı kózge ystyq kórinedi. Endi oqýshylar mektep aýlasyn tazdyń basyndaı tyqyrlap tastaǵandyqtan úziliste kóleńke izdep sendelmek. Bul – «atańnan mal qalǵansha tal qalsyn» dep túısingen qazaqtyń dúnıetanymyna jat áreket. Muny bizge jınalǵan bir top turǵyn aıtty.
«Mektep mańyndaǵy aǵashtar zańsyz kesildi. Bul durys emes. Naqty bir sheshim shyqsa úndemes edik. Mektep basshylarynyń qaraǵaılardyń balalarǵa qaýip tóndirip turǵanyn, bolashaqta munda shyrsha aǵashy egiletinin aıtyp jatyr. Eger tamyryn alyp qarasaq, qaraǵaıdiki jaıylyp, shyrshaniki tik ósedi. Iаǵnı shyrsha aǵashy odan da qaýipti», deıdi qala turǵyny Ekaterına Týsýpbaeva.
Shahar turǵyndarynyń birqatary «qaýipsizdikti oılasa, mektepke qarama-qarsy ornalasqan jataqhana aýlasyndaǵy qulaıyn dep turǵan qaraǵaılardy nege shappaǵan» dep renishin bildirdi. Tipti keıbiri mektep basshylyǵynyń is-áreketin aqtap álek. «Bilim oshaǵy basshysynyń aǵashtardy ruqsatsyz keskeni durys emes shyǵar, biraq ol eń aldymen qaýipsizdikti oılady», dep birjaqty qaramaýǵa shaqyrdy. Al mektep dırektory Janar Jaqypbekova óz kinásin moıyndap otyr.
«Kinámdi moıyndaımyn. Mektepte myńnan asa bala oqıdy. Kishkentaı 30 baldyrǵan balabaqshada júr. 100-den asa qyzmetker bar. Oqýshylar mekteptiń aýlasynda júgirip júredi. Men bul jerde aǵashtardy emes, balalardyń, mektep qyzmetkerleriniń qaýipsizdigin kóbirek oıladym», deıdi J.Jaqypbekova.
Jalpy, mektep aýlasynan 16 qaraǵaı, 7 qaraǵash, 1 terek kesilgen. Bul másele áli qaralýda. Bilim oshaǵy basshysynyń kináli, kinásiz ekeni jaıly naqty sheshim jaqyn arada shyǵady.
Jetisý oblysy
