«Qazaqstannyń Aýyl sharýashylyǵy mınıstrligi men Japonııanyń aýyl, orman jáne balyq sharýashylyǵy mınıstrligi arasyndaǵy ekijaqty belsendi yntymaqtastyqtyń nátıjesinde tıisti kelisim jasaldy. Osy oraıda Japonııaǵa jylqy etin eksporttaýǵa quqyǵy bar kásiporyndardyń tizimine taǵy 9 qazaqstandyq et óńdeý kásiporny engizildi», delingen mınıstrlik málimetinde.
Olardyń arasynda «Kaindy» JShS (Almaty oblysy), «ASEM-ZHETYSU» JShS (Almaty oblysy), «Meat processing Complex Bizhan» JShS (Aqmola oblysy), «Asyl-Asyl» (Atyraý qalasy), «Kuanysh» JK (Atyraý qalasy), «Birlestic» ShQ (Qaraǵandy oblysy), «EURASIA INVEST LTD» JShS (Qaraǵandy oblysy), «ARAY KZ»» JShS (Qaraǵandy oblysy), «BEEF EXPORT GROUP» JShS (Qostanaı oblysy) qamtylyp otyr.
«Buǵan deıin atalǵan tizimge 34 qazaqstandyq kásiporyn engizilgen bolatyn. Osylaısha, búgingi tańda jalpy 43 otandyq et óńdeý kompanııasy óz ónimderin Japonııa aýmaǵyna eksporttaı alady», dep atalyp ótken vedomstvo habarlamasynda.
