Endi qala turǵyndary paıdalanylǵan nan ónimderiniń qaldyqtaryn jabdyqtalǵan arnaıy orynda qaldyrady. Ár eki kún saıyn konteınerlerdegi nan qaldyqtary jınalyp, suryptalyp, keptirilip, sehqa jiberiledi. Arnaıy jabdyqta nan qaldyqtarynan iri qara men usaq malǵa arnalǵan túıirshiktelgen jem daıyndalady. Daıyn ónim qajet etken sharýa qojalyqtary men basqa da kásipkerlerge satylady.
Bul jobany kásipker Arman Saǵynaev ázirlegen. Onyń jobasy ákimdik tarapynan qoldaýǵa ıe bolyp otyr.
«Men ýaqytty bosqa ótkizbeýge sheshim qabyldadym, nesıe alyp, óz jobamdy iske asyra bastadym. Bóshkeler satyp alyp, olardy óz qolymmen jabdyqtap, boıadym. Qytaıdan qural-jabdyqqa tapsyrys berdim. Bul jumysty aldyn ala zerttep, aqparat izdestirdim. Birqatar jem shyǵarýshymen kezdesip, málimet jınadym. Baǵa monıtorıngin jasap, jumystyń qarajatyn eseptedim. Múmkindigim bar ekenine kóz jetkizgen soń, qala boıynsha nan konteınerlerin ornatýdan bastaımyn dep sheshtim. Birinshiden, bul qala turǵyndarynyń nan ónimderiniń qaldyqtary boıynsha problemasyn sheshýge kómektesedi. Ekinshiden, ıtter qoqys jáshigin shashyp, lastamaıdy. Osy jobada qoldaý bildirgen qalalyq turǵyn úı-kommýnaldyq sharýashylyǵy bólimine alǵys aıtamyn», dedi A. Saǵynaev.
Qazirgi ýaqytta Nursaıa, Avangard, Vokzal mańy yqshamaýdandary men Sátpaev kóshesi boıyna 50 jasyl tústi bóshke túrindegi arnaıy konteıner ornatyldy.
Aldaǵy ýaqytta qalada osyndaı 200 konteıner ornatý josparlanýda.
