«Quqyq qorǵaý organdary ǵımarattaryna shabýyldaý nátıjesinde 1 259 tabeldik qarý urlandy, onyń ishinde avtomattar, tapanshalar men granatomettar boldy. Atap aıtqanda, Almaty oblysynda polısııa departamenti ǵımaratynan 53 avtomat, 367 tapansha, 1 granatomet, sondaı-aq 23 myńnan astam patron urlandy. Jambyl oblysynda 200 avtomat, 148 tapansha, 11 granatomet, bir pýlemet jáne 40 myńǵa jýyq patron qoldy boldy», dedi ol Ortalyq kommýnıkasııalar qyzmetindegi brıfıng barysynda.
Bas prokýratýra ókiliniń atap ótýinshe, Rezıdensııada qıratýlardan keıin 130 dana qarý men oq-dárilerdiń jetispeýshiligi anyqtaldy. Onyń ishinde 80 granata, 17 tapansha, 11 avtomat, 21 granatomet jáne snaıper myltyǵy bar.
«Barlyq faktiler boıynsha tergep-tekserýler júrgizilip jatyr. Qarý-jaraq qoımalary tabylyp, olarǵa qatysy bar adamdar anyqtalýda. Qazir 481 birlik qarý tabyldy. Bul barlyq urlanǵan qarýdyń úshten biri. Qalǵany qylmyskerlerdiń qolynda», dedi Eldos Qılymjanov.
