Ulttyq akademııalyq kitaphanada Qazaqstan Respýblıkasynyń eńbek sińirgen ǵylym qaıratkeri, Halyqaralyq joǵary mektepter ǵylym akademııasynyń qurmetti akademıgi, Qazaqstan Jazýshylar odaǵynyń Sáken Seıfýllın atyndaǵy syılyǵynyń laýreaty, «Parasat» ordeniniń ıegeri, fılologııa ǵylymdarynyń doktory, professor Tursynbek Kákishulynyń týǵanyna 95 jyl tolýyna oraı dóńgelek ústel ótti. Atalǵan is-shara synshy-ǵalym, jazýshy Tursynbek Kákishulynyń qazaq ádebıetiniń órkendeýine qosqan úlesin baǵalaý, ultjandylyǵy men ádebıetke degen adaldyǵyn keler urpaqqa, qazirgi jastarǵa úlgi etý, sonymen birge ǵalymnyń artynda qalǵan murasyn dáripteý, onyń rýhyna qurmet kórsetýdi maqsat etti.
Dóńgelek ústeldi aqyn, Qazaqstan Jazýshylar odaǵynyń hatshysy, Nur-Sultan qalasy fılıalynyń dırektory Dáýletkereı Kápuly júrgizip, T.Kákishulynyń qazaq ádebıetine qosqan orasan zor eńbegine, ustazdyq jolyna toqtala kelip, elordadaǵy jańadan ashylatyn №94 mektep-gımnazııasyna Tursynbek Kákishev esimin berý týraly usynystar aıtylǵanyn, elorda áýejaıy mańyndaǵy kottedjder qalashyǵynda ǵalym atyna kóshe berilgenin qýanyshpen aıtyp ótti, ári ustazy týraly jyly esteliktermen bólisti.
Ulttyq ǵylym akademııasynyń akademıgi, fılologııa ǵylymdarynyń doktory, professor Dıhan Qamzabekuly ǵalymnyń ulttyq ádebıet ǵylymyna janashyrlyǵy, adaldyǵy keıingi urpaqqa úlgi bolady deı kelip: «Ol ǵylymǵa salystyrmaly túrde kesh keldi, biraq úlken mektep daıarlap ketti, ǵalymnyń súbeli eńbegi ádebıet jáne óner, syn salasynyń qalyptasyp-damýynda úlken baǵdar boldy dep esepteımiz. Ásirese 1986 jylǵy Jeltoqsan kóterilisi kezindegi azamattyq ustanymy týraly bólek aıtýǵa bolady, ol kezde dekan kezi. «Sadaqtyń» rýhy men mazmuny da Alash taqyryby boldy. Ol qazaq zııalylaryna tutas qaraı aldy. Eýrazııa ulttyq ýnıversıtetinde ǵalym atynda memorıaldyq kitaphana bar. Keleshekte Tursekeńniń rýhyndaǵy jańa zertteýler dúnıege keledi dep senemiz» dep qorytyndylady.
Ulttyq ǵylym akademııasynyń akademıgi, fılologııa ǵylymdarynyń doktory, professor Baýyrjan Omaruly ustaz Tursynbek Kákishev týraly: «Búgin bárimizdiń ustazymyz, aǵa býynnyń ishindegi óte zııaly adam retinde, aıtatynyn eshkimnen qaımyqpaı aıtatyn azamat retinde ultymyzdyń tarıhynda qalǵan Tursynbek aǵamyzdy ulyqtaý úshin jınalyp otyrmyz. Qazirgi urpaq tarıhqa qaraǵan kezde aınalyp soǵatyn «jıyrma jetinshi jylǵylar» degen bir uǵym bar. Serik Qırabaev, Tursynbek Kákishev, Zeınolla Qabdolov, Músilim Bazarbaev, Nyǵmet Ǵabdýllın, Rahmanqul Berdibaev, Úshkiltaı Subhanberdına, Telǵoja Januzaq,...bul tizimdi jalǵastyra berýge bolady. Bulardyń barlyǵy jıyrma jetinshi jylǵylar. Osylardyń ishinde toqsan bes jasyn kózimen kórgen Telǵoja Januzaq aǵamyz. Osy jıyrma jetinshi jylǵylardyń arasyndaǵy ǵıbratty ǵalym, ulaǵatty ustaz, abyroıly aqsaqal, ardaqty aǵa Tursynbek Kákishevtiń orny bólek. Ol ǵylymdaǵy keıingi býynǵa jaqsy qarady, bárine jol ashty, jastardy qoldady, qoldaýyn kórgenniń birimiz. Ol kisi alys-jaqyn shetelderdiń arhıvterin túgel súzip shyqqan adam, qaı arhıvke barsań da Tursekeńniń qoly turatyn», degen júrekjardy oıyn aıtty.
Ulttyq ǵylym akademııasynyń korrespondent-múshesi, fılologııa ǵylymdarynyń doktory Amantaı Shárip jáne ǵalymnyń inisi Jeńis Esimuly da atalǵan is-sharaǵa arnaıy qatysyp, akademık týraly estelikterimen bólisti. Saıasattanýshy, Qazaqstannyń eńbek sińirgen qaıratkeri Seıdahmet Quttyqadam, pýblısıst, aýdarmashy Qaıyrbek Sádýaqasov, aqyn Baqytjan Tobaıaqov, fılologııa ǵylymdarynyń doktory, professor Rahymjan Turysbek, jazýshylar Tóken Áljan, Jádı Shákenuly, Aıgúl Kemelbaeva, alashtanýshy, professor Saǵymbaı Jumaǵul, Shaısultan Shaıahmetov atyndaǵy Til-qazyna ǵylymı-praktıkalyq ortalyǵynyń dırektory Erbol Tileshev sııaqty zııaly qaýym ókilderi de is-sharaǵa qatysty. Qazaq ádebıetiniń ósip-órkendeýine erekshe úles qosqan ǵalymnyń esimi ulyqtala beretini shúbásiz.
