Aımaqtar • 19 Tamyz, 2022

«TekTau»-dyń baly tanymal

35 ret kórsetildi

Jetisý óńirinde teńiz deńgeıinen 1 425 metr bıiktikte Jońǵar Alataýynyń eteginde tabıǵı taza bal óndiriledi. Munda Eskeldi aýdanyndaǵy «TekTau» JShS 300-deı aranyń uıasyn ustap, omartashylyqpen aınalysýda. Seriktestik jylyna 100 tonna ónim óndirýge qaýqarly. О́zi óndirgenimen qatar olar baldy jergilikti omartashylardan da satyp alady. Baldyń sapasy men tazalyǵy ózderiniń arnaıy zerthanasynda tekserýden ótedi. О́nimderin otandyq naryqqa, BAÁ men Reseıge jáne Qytaıǵa eksporttap otyr.

Seriktestik dırektory Rýs­lan Kýtlýkovtyń aıtýynsha, kásiporynnyń basty mindeti – tabıǵı taza ónim óndirý. Soǵan sáıkes kompanııa «TekTau-dyń» baly ár shańyraqta bolýǵa tıis» degen urandy ustanym etip alǵan.

«Baldyń sapasy men ta­zalyǵy óndiristiń búkil keze­ńinde baqylanady. Onyń standartqa saı bolýyn jiti qa­­daǵalaımyz. Ár tuty­ný­shy­myzdy naǵyz taý balynyń dá­mimen tamsandyrsaq deımiz. Bizdiń zerthanamyzda baldyń quramyndaǵy dárýmender men paıdaly qasıetterdi tó­mendetýge áser etetin zattardy anyqtaımyz. Sol sııaqty ara­lardyń ómir súrýine qolaıly orta qalyptastyramyz», deıdi R.Kýtlýkov.

«TekTau» JShS baldyń 4 túrin – taý, orman, qyr balda­ryn jáne Altaı taýynyń balyn óndiredi. Baldyń qap­ta­masyna erekshe kóńil bó­linedi. Máselen, taý baly jóke aǵa­shy­nan jasalǵan, ishi balaýyz­ben óńdelgen bóshkege, sol sııaq­ty shaǵyn plastıkalyq ydys­­tarǵa quıylady. Oǵan qosa bal­dyń barlyq túri shyny quty­larǵa, al bal uıashyqtary aǵash qoraptarǵa salynady. Mun­daı ásem bezendirilgen brend ónimdi taptyrmas syılyq der edik.

«Aradan kóp nárse úıre­nýge bolady. Ol bizge paıda­ly ónim berip qana qoı­maı, eńbekqorlyqqa, shydam­dy­lyqqa úıretedi, toppen jumys isteýdiń artyqshylyǵyn tú­si­nýge kómektesedi. Aranyń bal jasaý prosesindeı kúr­deli prosesti eshteńemen salys­tyrýǵa bolmaıdy. Mysal úshin birneshe derekti keltire ketsem. Ara gúl shyrynyn óziniń artqy eki aıaǵynda bolatyn arnaıy qýys – «bal saýytynda» saqtap, ony omartaǵa jetkizedi. «Bal saýytynyń» syıymdylyǵy shamamen 70 mıllıgramm, biraq ony toltyrý úshin araǵa 1-1,5 myń gúlge qonyp shyǵýyna týra keledi», deıdi omartashy.

Onyń aıtýynsha, óńdelgen shirneni uıashyqtyń bir tor kózinen kelesi bir tor kózine aýystyryp, jeldetip, artyq ylǵalyn ábden ketiredi. Munyń ózi 8-10 kúndeı ýaqytty ala­dy. Bul kezde odan áli jetil­megen bal shyǵady. Onyń bý­lanýyn tezdetý úshin aralar qanattarymen jeldetedi. Omartanyń janyna kelgende estiletin ýil – sol dybys. Ara baldy osylaı jasaıdy.

Shyryn uıashyqta tıisti qoıýlyq deńgeıine jetkende balǵa aınalady. Baly bar uıashyqtar balaýyzben jabylyp, ónim pisip-jetiledi. Bir kılo bal alý úshin omartadaǵy aralar shamamen 10 mln gúldi aralap shyǵady. Árıne, baldy bir emes, birneshe ara jınaıdy. Biraq bir aranyń ózi at­qaratyn jumys az emes, bir kúnde jumysshy ara 5-7 myń gúlge qonady eken.

Ara sharýashylyǵymen aınalysýdyń ereksheligin baıan­­daı otyryp Rýslan Kýt­lýkov aralar týraly taǵy bir tańyrqatar derek aıtty.

«Bir qyzyǵy, qaı jaqta shy­ryndy gúlderdiń kóp eke­nin bildirip, basqa aralardy kómekke shaqyrǵanda ol bı­leıdi. Onyń jyldamdyǵy men bı qımyldary shyryndy al­qaptyń qashyqtyǵy men ba­ǵytyn kórsetedi. Qazirgi kezde bizdiń alqapta 300-deı ara­nyń uıasy ornalastyrylǵan. Kom­panııamyz bal sharýashy­ly­ǵymen 2015 jyldan beri aı­nalysady, kásiporyndy 2018 jyly ashtyq. Osy ýaqyt ara­lyǵynda edáýir tájirıbe jı­naq­tap, joǵary biliktilik deń­geıine jettik. Qazirgi kezde bizdiń balymyzdyń naryqta óz orny bar, eksportta da baǵa­lanyp, el azamattarymen qatar BAÁ men Qytaı turǵyndary da turaqty tutynatyn boldy», deıdi sharýa ıesi.

Jalpy «TekTau» JShS Eskeldi aýdanyna qarasty Sy­rymbet aýylynda ornalasqan. Onda baldy qaptaý sehy, baldy krıstaldandyrýǵa arnalǵan termokamerasy bar. Jáne qoı­ma oryndary men keńse de sol jerde. Kásiporynda 10 adam jumys isteıdi.

Aıta ketsek, Jetisý oblysynda byltyr 280 tonna bal óndirilgen. Omartashylyqqa ja­salatyn memlekettik qol­daý jer­gilikti bıýdjetten qaras­tyryldy.

 

Jetisý oblysy

Sońǵy jańalyqtar

Senbige arnalǵan aýa raıy boljamy

Aýa raıy • Búgin, 15:21

Uqsas jańalyqtar