Eki eldiń vıse-premerleri «Qarasý» jáne «Aq-tilek» avtojol ótkizý pýnktteri aýdanyndaǵy ındýstrııalyq saýda-logıstıkalyq keshenniń iske asyrylý barysymen tanysty.
Taraptar ITLK qyzmetin retteý týraly úkimetaralyq kelisimge qol qoıýdy 2022 jylǵy qazanǵa deıin pysyqtaýǵa ýaǵdalasty.
Aıta keteıik, birlesken ISLK qurý jáne onyń jumys isteý tujyrymdamasy QR Prezıdenti Q. Toqaevtyń 2019 jylǵy 27 qarashadaǵy Qyrǵyz Respýblıkasyna memlekettik saparynyń jáne Qazaqstan Respýblıkasy men Qyrǵyz Respýblıkasynyń Joǵary memleketaralyq keńesiniń besinshi otyrysynyń qorytyndylary boıynsha eki el basshylarynyń tapsyrmasyna sáıkes ázirlendi.
Sondaı-aq sapar aıasynda vıse-premer Qazaqstan-Qyrǵyz saýda-ekonomıkalyq yntymaqtastyǵy jónindegi jumys tobynyń ekinshi otyrysyna qatysty.
Serik Jumanǵarın Qyrǵyz Respýblıkasy Qazaqstannyń Ortalyq Azııa óńirindegi negizgi saýda-ekonomıkalyq áriptesteriniń biri ekenin atap ótti.
«Qazaqstandyq statıstıka derekteri boıynsha Qyrǵyz Respýblıkasy men Qazaqstan Respýblıkasy arasyndaǵy taýar aınalymy 2022 jylǵy qańtar-maýsymda $495,7 mln-dy qurady, bul ótken jyldyń uqsas kezeńimen salystyrǵanda 5,7%-ǵa artyq, onyń ishinde eksport – $303,3 mln, ımport – $192,3 mln», dedi Serik Jumanǵarın.
Taraptar ózara saýdany ulǵaıtý maqsatynda otyrys barysynda qol qoıylǵan «Qazaqstan Respýblıkasynyń Saýda jáne ıntegrasııa mınıstrligi men Qyrǵyz Respýblıkasynyń Aýyl sharýashylyǵy mınıstrligi arasyndaǵy jemis-kókónis ónimderin jetkizýdi uıymdastyrý nıeti týraly ózara túsinistik týraly» memorandým sheńberinde Qyrǵyz Respýblıkasynan Qazaqstanǵa erte jemis-kókónis ónimderin jetkizýdi júzege asyrý jóninde ýaǵdalasty.
Sondaı-aq qol qoıylǵan «Qazaqstan Respýblıkasynyń Saýda jáne ıntegrasııa mınıstrligi men Qyrǵyz Respýblıkasynyń Ekonomıka jáne kommersııa mınıstrligi arasyndaǵy yntymaqtastyq jónindegi memorandým aıasynda taraptar saýda rásimderin jeńildetýge, bıznes júrgizý shyǵyndaryn azaıtýǵa kelisti jáne elder arasyndaǵy elektrondyq qujattarmen ózara almasýdaǵy yntymaqtastyqty damytýǵa nıetti.
