Fılıaldyń ashylý saltanatynda sóz sóılegen Ál-Farabı atyndaǵy QazUÝ rektory J.Túımebaev: «Memleket basshysy atap ótkendeı, ǵylym men tehnologııany, ınnovasııany damytý – elimizdiń básekege qabiletin arttyratyn negizgi salanyń biri. Bilim berý júıesin jeke ǵylymı ortalyqtarmen jáne tehnoparktermen biriktirý – myqty zertteý ýnıversıtetterin qalyptastyrýǵa múmkindik beredi. Prezıdent óz Joldaýynda tehnıkalyq mamandar daıarlaý máselesine erekshe mán bere otyryp, ásirese joǵary jáne joǵary oqý ornynan keıingi bilimdi damytýǵa strategııalyq basymdyq berip keledi. Búginde álemdegi 500-den asa iri halyqaralyq joǵary oqý ornymen turaqty áriptestik baılanystaǵy QazUÝ-da MIFI fılıalynyń ashylýy – elimizde bilikti tehnıkalyq mamandar daıarlaýǵa úlken serpilis beredi», dep atap ótti.
Jıyn barysynda Ǵylym jáne joǵary bilim mınıstri Saıasat Nurbek Prezıdent basymdyq berip otyrǵan joǵary bilim berý salasynda bilikti mamandar daıarlaý máselesiniń ózektiligine, sonymen qatar aldaǵy jyldarda ǵylymı kadrlardy oqytý, ǵylymı-zertteý jumystaryn jetildirý ádistemesiniń, qarjylandyrý jaǵynyń pysyqtalatynyna jiti toqtaldy. Al kelesi jyldan bastap ǵylym salasyn qarjylandyrý eki esege deıin kóbeıetin bolady.
Jahandyq ózgerister turaqty damý máselesinde jańa tehnologııalyq serpilistiń asa qajettigin kórsetip otyr. Bul zamanaýı kadrlar daıarlaýmen tyǵyz baılanysty. MIFI fılıalynyń basty maqsaty – ıadrolyq fızıka, lazerlik jáne plazmalyq tehnologııalar, atom energetıkasy, nanomaterıaldar salalarynda mamandardy birlesip daıarlaý. Ol bakalavrıat, magıstratýra jáne doktorantýrany qamtıdy. Bilim berý baǵdarlamalary bolashaqtyń mamandyqtaryna baǵdarlanǵan ári halyqaralyq ınjenerlik standarttarǵa sáıkes keledi. Osy oraıda fılıal stýdentteri sapaly ınjenerlik bilim alýmen qatar, ǵylymmen de aınalysady, zertteýshilik daǵdylardy ıgerip, zamanaýı ǵylymı zerthanalarda taǵylymdamadan ótedi. Oqytý QazUÝ, sondaı-aq MIFI bazasynda, al tájirıbelik baǵyttaǵy sabaqtar Iаdrolyq fızıka ınstıtýtynda oqytylady.
Reseıdiń Ǵylym jáne joǵary bilim mınıstriniń orynbasary Natalıa Bocharova fılıaldy ashý barysyndaǵy ekijaqty kelisimder, yqpaldastyqqa qatysty júzege asqan jumystar barysyna toqtalyp, tehnıkalyq joǵary oqý ornynyń qyzmetin shetelderde uıymdastyrýdyń ózindik qıyndyqtary týraly aıtyp ótti. Osyǵan qaramastan, qysqa merzimde joba júzege asyp, ǵylymǵa qyzyǵýshylyq tanytqan jastar úshin mol múmkindik ashylyp otyr. Al «Rosatom» memlekettik korporasııasy bas dırektorynyń personal jónindegi orynbasary Tatıana Terenteva elimizdi ǵylym men bilim salasyndaǵy strategııalyq seriktes retinde atap ótti. «Rosatom» sońǵy on jyldan astam merzimde áriptes memleketter úshin ulttyq ıadrolyq baǵdarlamalarǵa mamandar daıarlaý baǵytyndaǵy jobalardy júzege asyryp keledi. Búginde kórshi elde ıadrolyq baǵyttaǵy mamandyqtarda 2 myńnan astam stýdent bilim alýda. Al zamanaýı múmkindikter kezeńinde mamandardy birlesip daıarlaýdyń mańyzdylyǵyna qatysty máselege MIFI rektory Vladımır Shevchenko toqtalyp, ári qaraıǵy yqpaldastyqqa senim artty.
Qatysýshylar Ál-Farabı atyndaǵy QazUÝ bazasynda ashylǵan MIFI ulttyq zertteý ıadrolyq ýnıversıteti fılıalynyń estelik taqtasyna qol qoıyp, fızıka-tehnıkalyq fakýltetindegi aýdıtorııamen tanysty.
ALMATY
