Bir apta buryn júkti áıel densaýlyǵyna shaǵymdanyp, №2 Kópbeıindi qalalyq aýrýhanaǵa jedel járdemmen jetkizildi. Onda onyń bas súıegine MRT jasaldy. Tekserý kezinde 32 jastaǵy júkti áıelde mı isigi anyqtaldy.
Naýqas Ulttyq neırohırýrgııa ortalyǵyna, Mı patologııalarynyń neırohırýrgııasy bólimshesine jatqyzyldy. Dárigerler emdeý taktıkasyn anyqtap, ana men bala úshin barlyq yqtımal qaýipterdi talqylaý úshin tez arada konsılıým jınady. Aýrýhanaǵa jatqyzǵan kezde áıeldiń júktilik merzimi 26 aptadan jańa asqan edi. Oǵan «Klınıkalyq dekompensasııa, ishki okklıýzııalyq gıdrosefalııa kezeńindegi mı qysymymen sol jaqtaǵy kópir-mıshyq buryshynyń isigi» dıagnozy qoıyldy.
«Biz naýqasqa shuǵyl operasııa jasadyq, Arendt boıynsha sol jaqtamalyq jabyq syrtqy túsirý drenajy, sodan keıin neıromonıtorıngti qoldana otyryp, kópir-mıshyq buryshynyń isigin mıkrohırýrgııalyq jolmen alyp tastadyq. Kólemi 5*5,5 sm bolatyn úlken isik mıdy qysyp, nátıjesinde áıeldiń kórý qabileti nasharlaı bastaǵan, táltirektep júrý jáne basqa da buzylýlar paıda bolǵan. Operasııanyń qıyndyǵy isik mı baǵanasynda ornalasqan, mundaı jaǵdaılarda mıdyń ómirlik mańyzdy bólikterine zaqym keltirmeý óte mańyzdy», dedi neırohırýrg dáriger Muratbek Tileýbergenov.
Shuǵyl operasııada quramynda tájirıbeli anestezıolog, neırofızıolog, transfýzıolog dárigerler bolǵan dárigerlerdiń mýltıdıssıplınarlyq komandasy jumys istedi. Sondaı-aq operasııa sharananyń jaı-kúıi men onyń júrek soǵysyn fýnksıonaldyq baǵalaýdy turaqty júrgizý maqsatynda sharanaǵa KTG baqylaýy júrgizildi.
«Maǵan osyndaı kúrdeli ota jasaǵan dárigerlerge alǵysymdy bildiremin. Olardyń bári men úshin alańdady, meniń jáne balamnyń ómirin qutqarýda úlken alańdaýshylyq sezimi boldy. Men Neırohırýrgııa ortalyǵy ornalasqan elordada turatynyma qýanamyn, operasııa óte tez, shuǵyl ótkizildi. Endi tez qalpyma kelemin dep úmittenemin, Qudaıǵa shúkir, kórý qabiletim qalpyna kele bastady. Azdap júre bastadym. Operasııa jasaǵan jáne meniń ómirim men balamdy qutqarýǵa qatysqandardyń barlyǵyna úlken alǵysymdy bildiremin!» dedi naýqas.
Shamamen 5 saǵatqa sozylǵan ota sátti aıaqtaldy. Bul operasııa pasıentke tegin, ıaǵnı MÁMS sheńberindegi kvota boıynsha júrgizildi. Kúrdeli operasııany Mı patologııalarynyń neırohırýrgııasy bólimshesiniń meńgerýshisi Nurjan Ryskeldıev, neırohırýrg dáriger Muratbek Tileýbergenov, anestezıolog dáriger Orazǵalı Qurmanbaev, neırofızıolog dáriger Sáýle О́teýova jáne ABUǴO Akýsherstvo bólimshesiniń meńgerýshisi Berik Pirimbetov jasady.
Dárigerler atap ótkendeı, qazir ana men balanyń ómirine eshqandaı qaýip joq, áıel júktiligin jalǵastyrýda.
