Kelisim boıynsha kıim úlgileri ulttyq órnegi bar jeke dızaında jasalmaq.
Sonymen qatar kelisimniń basty artyqshylyǵy – jankúıerlerge arnalǵan ekıpırovkalardyń qoljetimdi bolýy. Ár jankúıer fan-shoptardan ulttyq quramanyń eksklıýzıvti kıim úlgilerin, sondaı-aq erekshe dızaında daıyndalǵan taýarlardy satyp alý múmkindigine ıe bolady.
Ulttyq quramaǵa arnalǵan jańa fýtbol jeıdeleri ıtalııalyq «Errea Sport» kompanııasymen birge ázirlenedi. Barlyq ekıpırovka «100 OEKO-TEX» standarty boıynsha sertıfıkasııadan ótedi. Bul standart densaýlyqqa zııan zattarǵa qatań shekteý qoıady.
Oıyn formasy úsh jıyntyqtan turady: úı formasy, qonaq formasy jáne rezerv.
Ekıpırovkanyń dızaın jumystaryna qazaqstandyq dızaınerler jáne Errea mamandary qatysady.
Kelisimge qol qoıý úshin ÝEFA prezıdentiniń ulttyq qaýymdastyqtar boıynsha keńesshisi Iozef Klıment Qazaqstan astanasyna arnaıy keldi. Ol FIFA-nyń eýropalyq qaýymdastyqtar boıynsha dırektory Elhan Mamadovpen birge 19 qyrkúıek kúni ótetin Qazaqstan fýtbol federasııasynyń Konferensııasynyń mártebeli qonaǵy bolmaq.
«Qazaqstan fýtbol federasııasyna ÝEFA jáne onyń seriktestikterine yntymaqtastyqty qoldap, Kit Assiatance Scheme baǵdarlamasyna qosylǵany úshin alǵysymyzdy aıtamyz. Bul sheshim qazaqstandyq fýtboldyń ımıdjin arttyra túsedi dep senemin. Qazaq halqynyń ereksheligin bildiretin jeke dızaın daıyndaýǵa jáne jeke fan-shop iske qosýǵa múmkindik bar. ÝEFA bul sheshimdi jan-jaqty qoldaýǵa daıyn», dep atap ótti ÝEFA prezıdentiniń ulttyq qaýymdastyqtar boıynsha keńesshisi Iozef Klıment.
«Konferensııa qarsańynda FIFA jáne ÝEFA-dan kelgen áriptesterimizben birqatar kezdesý uıymdastyryldy. Búgin biz ÝEFA-nyń kezekti baǵdarlamasynyń qatysýshysy boldyq. Baǵdarlama Qazaqstan quramasynyń ımıdjin arttyrady dep senemin. Qoldaý kórsetken áriptesterimizge alǵys aıtamyn», dep atap ótti Qazaqstan fýtbol federasııasynyń bas hatshysy Oljas Abraev.
Aıta keteıik, ulttyq quramalar 2023 jylǵy maýsymnan bastap jańa formamen oınaı bastaıdy.
