«Eger UBT-ny aqyly negizde tapsyrýdyń taǵy úsh áreketin eskeretin bolsaq, onda 2023 jylǵy talapker testileýdi bes ret tapsyra alady. Mınıstrlik negizgi emtıhannyń barlyq jańalyqtaryn oqý jylynyń basynda, ıaǵnı qyrkúıekte jarııalaý týraly sheshim qabyldady. Bul bolashaq talapkerlerdiń nazaryn aýdaryp, UBT-ǵa jaqsy daıyndalýǵa kómektesedi dep oılaımyz», dedi QR Ulttyq testileý ortalyǵynyń dırektory Rýslan Emelbaev.
Jalpy testileý formatyna eshqandaı ózgerister engizilgen joq. Pánder sany da ózgerissiz qalady. Alaıda «Qazaqstan tarıhy» jáne «Oqý saýattylyǵy» pánderi boıynsha test tapsyrmalarynyń sanyna ózgerister engizildi. Endi «Qazaqstan tarıhynyń» bir nusqasynda 20 test tapsyrmasy bolady: bir durys jaýapty tańdaýmen 10 tapsyrma jáne kontekst negizinde 10 tapsyrma. Sondaı-aq buryn talapkerler «oqý saýattylyǵy» boıynsha 20 suraqqa jaýap berse, endi 3 mátin boıynsha 15 test tapsyrmasy beriledi.
Osylaısha, Qazaqstan tarıhy boıynsha – 20, oqý saýattylyǵy boıynsha – 15, matematıkalyq saýattylyq boıynsha – 15 jáne eki beıindi pán boıynsha 35 tapsyrma beriledi. Eń joǵarǵy upaı sany – 140. Testileýdiń jalpy ýaqyty 4 saǵatty (240 mınýt) quraıdy. Sondaı-aq erekshe bilim berý qajettilikteri bar balalar úshin qosymsha 40 mınýt ýaqyt saqtalady.
Aıta ketsek, 2022-2023 oqý jylynan bastap UBT beıindik pánder kombınasııalarynyń tizbesine «Informatıka» páni engizildi. Osyǵan baılanysty «Informatıka muǵalimderin daıarlaý», «Aqparattyq tehnologııalar», «Aqparattyq qaýipsizdik» bilim berý baǵdarlamalary toptaryna túsýshiler UBT-ny «Matematıka-Informatıka» kombınasııasy boıynsha tapsyrady.
«Qabyldanǵan sheshimniń arqasynda talapkerler óz bilimderin jan-jaqty kórsete alady dep úmittenemiz. Al UBT-ǵa daıyndalý úshin tegin onlaın testileý qoljetimdi bolyp qala beredi, sondaı-aq jaqyn arada tegin onlaın sabaqtar da bastalady. Bıyl shekti baldar ózgerissiz qalady. Akademııalyq adaldyqty qamtamasyz etý maqsatynda «1 kompıýter – 2 kamera – 1 testilenýshi» qaǵıdasy qatań saqtalady. Kompıýterlik ekrandarda testileýdiń ózinde kalkýlıator, perıodtyq keste jáne tuzdardyń erigishtigi qoljetimdi bolady», dep atap ótti Rýslan Emelbaev.
