Sonyń 75 paıyzdaıy, ıaǵnı 102 myńnan astamy UBT tapsyrýǵa ótinish beripti. Áıtse de bul balalardyń 14 paıyzy, ıaǵnı 14 633 oqýshy shektik deńgeıge jete almaǵan. Jalpy, mektep bitirýshi balalardyń 25 paıyzy, ıaǵnı 45 myńdaıy biliminiń tómendigine baılanysty UBT-ǵa jiberilmese, al olarǵa shektik deńgeıge jete almaǵandardy qossaq, barlyǵy 39 paıyz, ıaǵnı 60 myńǵa jýyq bala mektep baǵdarlamasyn tolyk meńgermegen bolyp shyǵady. Bul endi naǵyz masqara jaǵdaı emes pe? Sonda osynshama jasóspirim ómirin mektepte bosqa ótkizip kelgen be?
Shyntýaıtyna kelgende, qııýy qashqan bul máseleni tek Oqý mınıstrligi ǵana sheshe alady. Naryqtyq qatynastardy negizge ala otyryp, bilim berý júıesin qaıta qurmaı bolmaıdy. Bizdińshe, balalardyń oqýǵa degen yntasyn kóterýdiń bir joly – salalyq mınıstrlik tarapynan «9-synyptan soń 10-11-synyptarǵa tek «4» pen «5»-ke oqyǵandar ǵana ótedi» degen buıryqtyń shyǵarylýy. Sonda ata-ana da, bala da soǵan qaraı is qylady. Ata-ana balasynyń oqýyn bastaýysh synyptan bastap qadaǵalaıdy. Bala da eger sabaqty jaqsy oqymasa, 9-synyptan ári qaraı oqýǵa jol joq ekenin ishteı bolsa da sezedi. Tipti úlgerimi men tártibi nashar balalardy óz synyptarynda qaldyrsaq ta esh nárseden utylmas edik. Qaıta «men qatarymnan nege qaldym» degen bala ishteı namystanyp, tez eseıer edi.
Qysqasy, biz 10-11 synyptarǵa sabaqty tek jaqsy oqıtyndardy ǵana jibersek, onda olardy tártipsiz, sabaq oqymaıtyndardan ajyratyp, tolyqqandy bilim alýǵa naqty alǵyshart jasar edik. Búginde muǵalimniń jarty ómiri birqatar dymbilmestermen alysyp, bosqa ótip jatqanyn da oılaý kerek. Bolashaqta el tutqasyn ustaıtyn bilimdi de bilikti azamattar, mine, osy 10-11-di jaqsy bitirgenderden shyǵar edi. Joǵary oqý oryndaryna da tek bilimdi jastar barǵan bolar edi.
Berdaly RYSBEKOV,
zeınetker ustaz
Túrkistan oblysy,
Keles aýdany
