«Kúshti Prezıdent–yqpaldy Parlament – esep beretin Úkimet» qaǵıdasyn is júzine asyrýǵa kirisip kettik. Saılaý júıesi jańartyldy, endi barlyq deńgeıdegi depýtattar partııalyq tizimmen de, bir mandatty okrýgten de saılanady. Konstıtýsııalyq sot quzyreti artty, ol keler jyldan qyzmet ete bastamaq. Eń bastysy, sýperprezıdenttik basqarýdan prezıdenttik formaǵa aýystyq. Ata Zańnyń úshten biri jańartylyp, memleket demokratııalyq baǵytta batyl qadamdar jasaýda.
Memleket basshysy Joldaýynda bıyl prezıdenttik saılaýdy ótkizýdiń máni men mańyzyn eldik jáne álemdik minberden ashyq aıtty. Aldymen Prezıdent saılaýy, keler jyldyń kókteminde Parlament saılaýy ótpek. Osylaısha, bizde memlekettik ınstıtýttar qaıta qurylady.
Kópshilik Memleket basshysynyń Prezıdent saılaýyn kezekten tys ótkizý jónindegi bastamasyn qoldady. Sonymen qatar bul bastama jer-jerde qoǵam ókilderimen talqylandy.
Halyq saıası júıeni ózgertýdiń qajet ekenin jaqsy túsinip otyr. Kezekten tys Prezıdent saılaýy 20 qarashada ótetin boldy. Alda bizdi eldiń búkil saıası júıesin túbegeıli ózgertetin saılaý kútip tur. Ekonomıkany órkendetý, halyqtyń turmysyn jaqsartý syndy basty mindetterdiń iske asýy osy naýqannyń nátıjesine baılanysty bolmaq.
Prezıdent Qasym-Jomart Toqaev halyqqa saılaýaldy baǵdarlamasyn usynady. Onda ekonomıkalyq damýdy kózdeıtin tyń ári eleń eterlik bastamalar aıtylady dep úmittenemin.
Memleket basshysy saılaýdyń qatań túrde zańǵa saı ótetinine kepildik berdi. О́z basym naýqannyń ádil jáne ashyq óterine senemin. Azamattar úlken jaýapkershilikti sezinip, zań talaptaryn berik ustanýǵa tıis. Elimiz óz birligi men jaýapkershiligin tanytatyn kez keldi.
Prezıdent aıtqandaı, Qazaqstannyń bolashaǵy árqaısymyzdyń qolymyzda. Ádiletti Qazaqstandy birge quraıyq, aǵaıyn!
Gúlmıra BAIRKENOVA,
S.Amanjolov atyndaǵy ShQÝ professory,
zań ǵylymdarynyń kandıdaty
