Baıden óz sózinde Reseı Ýkraınaǵa basyp kirip BUU músheliginiń negizgi qaǵıdalaryn buzdy dep aıyptap otyr.
«BUU Qaýipsizdik Keńesiniń turaqty múshesiniń qataryndaǵy el egemendi memleketti kartadan óshirmek bolyp, basyp kirdi. Reseı BUU jarǵysynyń negizgi erejelerin buzdy. Sondaı-aq Pýtın óz sózinde ıadrolyq qarý qoldaný jóninde ashyq qoqan-loqqy kórsetti. Al, ıadrolyq soǵysty jeńý múmkin emes», dedi AQSh prezıdenti.
Baıden Kremldiń Ýkraınanyń keıbir bólikterin anneksııalaý úshin jalǵan referendým uıymdastyryp jatqanyn, bul BUU jarǵysyn buzý bolyp sanalatynyn atap ótti. Al, Pýtın «Reseıge qaýip tóndi» dep aqtalyp otyrǵanyn sóz etti. AQSh prezıdenti munyń shyndyqqa janaspaıtynyna basa nazar aýdardy.
«Reseıdi eshkim qorqytqan joq, Reseıden basqa eshkim janjal izdegen joq. Shyn máninde, biz bulaı bolatynyn eskertken edik», dedi Baıden.
Baıden bul soǵystyń aıaqtalýyn qalaıtynyn da atap ótti. Sondaı-aq egemendi memleketterdiń aýmaǵyn kúshpen tartyp alýǵa eshkimniń quqyǵy joq ekenin eske saldy.
Aq úı basshysynyń aıtýynsha, AQSh odaqtastarmen jáne seriktestermen birigip Reseıdi jaýyzdyq pen áskerı qylmystary úshin jaýapqa tartýǵa barlyǵyn jasap jatyr.
«Reseı azyq-túlik daǵdarysyn álemniń kóptegen elderiniń Ýkraınaǵa agressııa jasaǵany úshin salǵan sanksııalarymen baılanystyrýǵa tyrysýda. Endi bir nárseni túsindireıin. Bizdiń sanksııalarymyz Reseıge azyq-túlik pen tyńaıtqyshtardy shekteýsiz eksporttaýǵa tikeleı múmkindik beredi. Bul soǵys Reseıdiń azyq-túlik qaýipsizdigine qater tóndirip tur jáne muny tek Reseı ǵana toqtata alady», dedi ol.
Baıden Birikken Ulttar Uıymyna múshe árbir el Ýkraınanyń kez kelgen egemen memleket sııaqty quqyqtaryna ıe bolýyn qatań ári dáıekti túrde talap etý kerektigin atap ótti.
