Mınıstr barǵan «Muz aıdyny» kesheninde muz aıdynynan bólek, voleıbol, basketbol, jekpe-jek ádisterine baýlıtyn oqý-jattyǵý zaly, sporttyq bılerge arnalǵan horeografııalyq synyp bar. Qazir munda 7 sport túri boıynsha 615 adam jattyǵady.
Kelesi nysan – «Tarlan» sport kesheninde boks, kúres, taekvondo, aýyr atletıka boıynsha 350 adam jattyǵyp, 100 jattyqtyrýshy jumys isteıdi. Ashylǵanyna 6 jyl bolǵan keshende Qazaqstannyń 20 sport sheberi, 78 sport sheberine úmitker daıyndaldy. Keshende oblys ákimi Balalar jyly aıasynda óńirde demeýshiler kómegimen 80 oıyn alańyn salý bastalǵanyn jetkizdi.
Mınıstr ulttyq sportty zamanǵa saı jańǵyrtý maqsatynda «Uly dala joryǵy» atty jańa joba qolǵa alynǵanyn aıtyp, marafonǵa belsendilik tanytyp, jankúıer bolýǵa shaqyrdy. 1200 shaqyrymdyq marafon-báıge elordadan bastap Aqmola, Qaraǵandy, Ulytaý, Qyzylorda jáne Túrkistan oblystaryn qamtymaq.
Osy kúni Dáýren Abaev 62 myńnan asa jádiger jınaqtaǵan oblystyq tarıhı-ólketaný mýzeıinde de boldy. Á.Tájibaev atyndaǵy oblystyq ámbebap ǵylymı kitaphanada oblys turǵyndarymen kezdesýden keıin BAQ ókilderine suhbat berdi.
– Jurtshylyqpen júzdesýde kóptegen másele kóterildi. Olardy jergilikti ákimdikpen birlese sheshý joldaryn qarastyramyz. Birlesken jobalar qatarynda bıyl sahna bulbuly Roza Baǵlanovanyń 100 jyldyǵyna oraı ótken sharalardy atap óter edik. Tarıhı-mádenı eskertkishterge baı oblysta kórshiles óńirlermen baılanystyra otyryp, týrızmdi damytýǵa bolady, – dedi mınıstr.
Osydan keıin vedomstvo basshysy birqatar turǵyndy jeke qabyldap, máselelerin tyńdady. Mınıstr sapary Baıqońyr qalasynda jalǵasty.
Qyzylorda oblysy
