«Bılik pen qoǵam arasyndaǵy dıalog nyǵaıa tústi. «Halyq únine qulaq asatyn memleket» tujyrymdamasyna basa mán berilip otyr. Bul aýqymdy jumysty búkil qoǵamymyz birlese atqardy. Degenmen, osymen toqtap qalýǵa bolmaıdy», dedi Memleket basshysy.
Prezıdent osy sara joldan taıqymaı, ilgeri júrý kerek ekenin jetkizdi.
«Taǵy bir asa mańyzdy reforma – Prezıdenttiń bir ǵana merzimge saılanýy. Bizdiń aımaqtaǵy qaı memleketti alyp qarasańyz da, mundaı ózgeris múldem bolmaǵan. Sondyqtan bul reforma demokratııa jolyndaǵy batyl qadam dep senemin. Táýekelge bel býsaq ta, osyndaı sheshim halqymyzdyń jarqyn bolashaǵy úshin kerek dep kámil senemin», dedi Qasym-Jomart Kemeluly.
Sondaı-aq ol bul reforma ne úshin jasalmaqshy degen suraqqa da jaýap bere ketti.
«Másele mynada: Prezıdenttik laýazymǵa kóp jyl boıy bir ǵana adam ıe bolmaýy kerek. Álemde bolsyn, bizdiń elimizde bolsyn kóp jyl boıy bir ǵana adam eń joǵary laýazymǵa ıe bolsa, mundaı jaǵdaı elge de, Memleket basshysyna da abyroı ákelmeıdi. Biz bolashaqqa nyq senimmen qarap, adal, daryndy saıasatkerlerge jol ashýymyz kerek. Jalpy, jurt bizdiń saıası júıeni ózgertý týraly josparymyzdyń mán-mańyzyn jaqsy túsinip otyr», dedi Prezıdent.
Eske salaıyq, kezekten tys Prezıdent saılaýy bıylǵy 20 qarashaǵa belgilengen. Osy rette Prezıdent bul naýqan zańǵa sáıkes, ádil jáne ashyq ótetinine kepildik berdi.
«Túrkistandyqtar da saılaýǵa belsene qatysyp, óz tańdaýyn jasaıdy dep senemin. Otanymyzdyń bolashaǵyna bárimiz birdeı jaýaptymyz. Sondyqtan barshańyzdy el taǵdyryna beı-jaı qaramaýǵa shaqyramyn. Ádiletti Qazaqstandy birge quraıyq! Túrki áleminiń boıtumary – Túrkistan kórkeıe bersin!», dedi sóz sońynda Memleket basshysy.
