«Qazirgi halyqaralyq ahýal jóninde qysqasha aıta ketkim keledi. О́zderińiz bilesizder, álemdegi jaǵdaı ábden shıelenisip ketti. Osyndaı kúrdeli jaǵdaıda Qazaqstan halyqaralyq uıymdarda, eń aldymen, Birikken Ulttar Uıymynda daýys berý kezinde beıtarap ustanymyn saqtap otyr. Bul bizdiń ulttyq múddemizge saı keledi. Jerimizdiń bútindigi jáne elimizdiń amandyǵy – biz úshin bárinen mańyzdy. Sondyqtan parasattylyq pen sabyrlylyq tanytyp, arandatýshylardyń jeteginde ketpeýimiz kerek», dedi Prezıdent.
Qasym-Jomart Toqaevtyń aıtýynsha, qazaq halqynyń eń basty kúshi – birlik, parasattylyq jáne tózimdilik.
«Eger osy qundylyqtardan aıyrylyp qalsaq, elimizge úlken qaýip tónedi. Memleketterdiń terrıtorııalyq tutastyǵy mindetti túrde saqtalýy kerek. Bul – negizgi qaǵıdat. Men muny halyqaralyq arenada únemi ashyq jáne anyq aıtyp júrmin. Jaqynda Birikken Ulttar Uıymyna baryp, eń bıik minberden bul týraly taǵy da málimdedim. Bunyń bári beker emes. Aınalamyzda aýqymdy soǵys bolyp jatyr. Biz osyny eskere otyryp, eń aldymen, elimizdiń qaýipsizdigin oılaýymyz kerek», dep atap ótti Memleket basshysy.
El Prezıdenti óz sózinde Qazaqstan irgeles eldermen árdaıym tatý bolýy kerek ekenin aıtty.
«Qazaqta «Kórshimen tatýdyń kóńili toq» degen sóz bar. Eń bastysy, irgeles eldermen tatý bolýymyz kerek. Budan esh utylmaımyz. Sońǵy kúnderi kórshi elden, ıaǵnı Reseıden kóptegen adam kele bastady. Kópshiligi qazirgi ahýalǵa baılanysty amaldyń joqtyǵynan kelip jatyr. Olarǵa qamqorlyq kórsetip, qaýipsizdigine mán berýimiz qajet. Bul – saıası jáne gýmanıtarlyq másele. Osy máseleni men Úkimetke tapsyrdym. Jalpy osyndaı kúrdeli jaǵdaıda biz eń aldymen adamgershilik, sabyrlyq, uıymshyldyqty tanytýymyz kerek. Bizde eshqandaı daǵdarys joq, dúrbeleń de joq. Úkimet óz jumysyn atqarýy kerek. Syrttan kelgen adamdarǵa kómek kórsetiledi, biraq jeńildikter berilmeıdi. Jumystyń bári zań boıynsha, kelisimder boıynsha júrgiziledi», dep naqtylady Qasym-Jomart Toqaev.
Memleket basshysy jaqyn arada Reseımen tıisti kelissózder júrgiziletinin jetkizdi.
«Biz Reseı tarapymen kelissózder júrgizip, bul túıtkildi elimizdiń múddesine saı sheshemiz. Taǵy da qaıtalap aıtamyn, osyndaı almaǵaıyp kezeńde bizge, eń aldymen, bereke-birlik qajet. Eldiń tynyshtyǵyn saqtaı bilsek, turaqty damı alamyz. Barlyq máseleni baıyppen talqylap, aqylmen sheshýimiz kerek», dep túıindedi Prezıdent.
