Oblys ákimimen birge 320 tósektik oblystyq perınataldyq ortalyǵyna barǵan mınıstrge ortalyqtyń bas dárigeri Oleg Kım jyl basynan beri ana men bala saýlyǵyn saqtaý baǵytynda atqarylǵan jumystardy baıandady.
Munda jylyna orta eseppen 11 myńǵa jýyq ana bosanady. Ana men balaǵa medısınalyq kómek sapasyn jaqsartý úshin dárigerlerdi qosymsha oqytyp, ortalyq qajetti nevrolog, kardıolog, oftalmologter daıarlaý jolǵa qoıylǵan. О́tken jyly ortalyqta 12 349 náreste dúnıege kelse, bıyl 8 aıda 7 480 bala týǵan.
Mınıstr merziminen erte bosanǵan áıeldermen tildesip, anestezıologııa-reanımatologııa jáne qarqyndy terapııa bólimshesi jumysymen tanysty, tıisti tapsyrmalar berdi.
– Biz úshin basym baǵyttardyń biri – ana men balany qorǵaý bolyp qala beredi. Memleket basshysysy bastamashy bolǵan Balalar jylynda mınıstrlik balalar densaýlyǵyn nyǵaıtýǵa baǵyttalǵan birneshe bastamany júzege asyrýda. Osynyń nátıjesinde júkti áıelderdi bosanýǵa deıingi baqylaý aıasy 80 paıyzǵa artady, – dedi mınıstr.
Oblystyq jedel járdem stansasyna kelgen mınıstr sala jumysymen tanysyp, aýyldyq jerde jedel kómekke kóp kóńil bólý kerektigin atap ótti. Oblystyq medısınalyq jedel járdem stansasy quramynda 13 bólimshe jáne medısınalyq avıasııa bólimshesi men operatıvti bólim jumys isteıdi. Jyl basynan beri byltyrǵy osy kezeńmen salystyrǵanda shaqyrtýlar 5,9 paıyzǵa artyp otyr. Mınıstr qyzmetti ortalyqtandyrýdyń sońy shalǵaı eldi mekender turǵyndarynyń kómeksiz qalmaýyna soqtyrmaý keregin taǵy atap ótti. Mamandar tek shuǵyl jaǵdaılarda emes basqa da nozologııalar boıynsha bilim deńgeılerin kóterip otyrýy qajet, deıdi.
«Dostyq úıinde» ótken halyqpen kezdesýde mınıstr densaýlyq saqtaýdy damytýdyń birneshe basym baǵytyn atap ótti. Memleket basshysynyń tapsyrmasyna sáıkes «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasy iske asyrylýda. Joba aıasynda kóp beıindi aýdandyq ortalyq aýrýhanalar uıymdastyrylady, olardyń bazasynda ınsýlt jáne kardıologııalyq ortalyqtar, medısınalyq ońaltý, travmatologııa, hırýrgııa, reanımasııa jáne qarqyndy terapııa bólimsheleri, trıaj júıesi bar qabyldaý bólimshesi ashylady.
Jıyn barysynda mınıstr múgedek azamattarǵa medısınalyq kómektiń qoljetimdiligi, jedel járdemniń jetý ýaqyty, dári-dármekpen qamtamasyz etý, kadrlar daıarlaýǵa qatysty kóptegen suraqqa jaýap berdi.
О́ńirlik kommýnıkasııalar qyzmetiniń alańynda ótken baspasóz máslıhatynda Densaýlyq saqtaý mınıstri bıyl elimizde medısınalyq joǵary oqý oryndaryn bitiretin 2 692 túlektiń 104-i Qyzylorda oblysynda jumys isteıtinin habarlady.
– Aýylǵa jumysqa kelgen jas mamandardy áleýmettik qoldaý sharalary aıasynda oblysta 25 maman kóterme járdemaqy aldy, bireýi turǵyn úımen qamtamasyz etildi. Taǵy bir maman basqa da áleýmettik qoldaý sharalaryna ıe boldy. Salada jetistiktermen qatar, bárimiz birigip sheshetin mindetter kóp, – dedi Ajar Ǵınııat.
Qyzylorda
