Taraptar saýda-ekonomıkalyq, ınvestısııalyq jáne mádenı-gýmanıtarlyq yntymaqtastyqty damytýǵa erekshe nazar aýdara otyryp, qazaq-qatar qarym-qatynasynyń jaı-kúıi men damý perspektıvalaryn talqylady.
Qazaqstan Prezıdenti Qatardyń álemdik arenada mańyzdy ról atqaratyn halyqaralyq qaýymdastyqtyń bedeldi múshesi ekenin atap ótti.
Memleketter basshylary saýda-ekonomıkalyq baılanystardy nyǵaıtýǵa eki jaqtyń da nıetti ekenin naqtylady. Qasym-Jomart Toqaev qatarlyq kompanııalarǵa jan-jaqty qoldaý kórsetýge daıyn ekenin málimdep, olardy elimizdegi birlesken ınvestısııalyq jobalardy júzege asyrýǵa belsendi qatysýǵa shaqyrdy. Atap aıtqanda, aýyl sharýashylyǵy, energetıka, munaı-hımııa, taý-ken ónerkásibi, qarjy salalarynda mol múmkindikter bar ekenine toqtaldy. Qasym-Jomart Toqaev kelesi jyly Qazaqstan men Qatar arasynda dıplomatııalyq qarym-qatynastar ornaǵanyna 30 jyl tolatynyn atap ótti.
– Bul – erekshe mereıli beles. Osy merzim ishinde biz tyǵyz memleketaralyq yntymaqtastyq ornattyq. Syndarly saıası dıalog qurdyq. Osynyń bári dástúrli dostyq pen berik áriptestikke negizdelgen. Astanadaǵy «Ál-Farabı» meshiti men sheıh Támım atyndaǵy bilim ordasy – osynyń aıqyn kórinisi. Sondaı-aq, jýyrda Almaty oblysynyń О́tegen batyr kentinde perınataldy aýrýhananyń qurylysy bastaldy. Biz Qatar Memleketiniń elimizdi kórkeıtýge qosqan úlesi men jan-jaqty qoldaýyn eshqashan umytpaımyz. Bolashaqta da qazaq-qatar qatynastaryn ári qaraı damytýǵa daıynbyz, – dedi Memleket basshysy.
О́z kezeginde Qatar Ámiri sheıh Támım ben Hamad ál-Tanı Qasym-Jomart Toqaevqa qonaqjaılyq kórsetkeni úshin alǵysyn alǵys aıtyp, aldaǵy Respýblıka kúni merekesimen quttyqtady.
Qatar Ámiri Qazaqstanmen aradaǵy jan-jaqty baılanystardy odan ári damytýǵa nıetti ekenin atap ótip, ekijaqty úkimetaralyq komıssııanyń jumysyn jandandyrý qajet ekenin aıtty. Sondaı-aq kópjaqty qurylymdar boıynsha, onyń ishinde AО́SShK aıasyndaǵy jumystardy jalǵastyrý qajet ekenin jetkizdi.
