Sýretti túsirgen Dmıtrıı EROFEEV
Jalpy, Besqaınar aýylynda 152 tútin bar. Bul – Kóksý aýdany boıynsha kógildir otynǵa qosylyp jatqan tórtinshi aýyl. 18 qazan kúni taǵy 3 aýyl (Jambyl, Mámbet, Amangeldi) gazben qamtyldy. Jyl sońyna deıin taǵy 4 aýylǵa gaz tartylsa, 12 aýyldyń jobalyq-smetalyq qujattary daıyn bolady. Kelesi jyly taǵy 12 aýylǵa gaz tartylmaq. Osylaısha, aýdandaǵy barlyq aýyldy gazdandyrýdy josparlap otyr.
Jetisý oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Ernat Bázil: «Qarapaıym halyqqa eń aldymen jylý, taza sý kerek. Osyǵan oraı óńirge gaz tartyldy. Jetisý óz aldyna oblys bolǵannan keıin oblys ákiminiń tapsyrmasymen qansha aýylǵa gaz tartý kerektigin tekserdik. Nátıjesinde, 192 aýyl gazǵa qosylý kerektigi anyqtaldy. Bıyl bizde 22 joba bastaldy. Ony kelesi jyly aıaqtaımyz dep josparlap otyrmyz. 28 jobanyń smetalyq-qujattary daıyn», deıdi E.Bázil.
2025 jylǵa deıin Qaratal, Kóksý, Kerbulaq, Eskeldi aýdandary men Tekeli jáne Taldyqorǵan qalasy tolyqtaı kógildir otynmen qamtylmaq. Osy rette gazdy úıine memleket tarapynan tegin qosqan kópbalaly ana Bıbigúl Kóbegenova qýanyshyn jasyrmady.
«Osy úıde 1978 jyldan beri turamyz. Kúıeýimniń qaıtys bolǵanyna 22 jyl boldy. 10 jyldan keıin úlken qyzym ómirden ótip, artynda úsh bala qaldy. Otbasymyzda 2 múmkindigi shekteýli adam bar. Jalpy, 11 adam turamyz. Buryn biz kómir tasyp, aǵash kesetinbiz», dedi B.Kóbegenova.
Aıta keteıik, aýdanda gazǵa qosylý jumystarynyń quny – 170 myń teńge. Sondaı-aq «Jetisýoblgaz» JShS-nan materıaldar men gaz qazandyǵyn 10 aıǵa deıin bólip tóleý jáne halyqtyń áleýmettik osal toptary úshin «BSP GROUP LTD» JShS-nan 20%-ǵa deıin jeńildikter qarastyrylǵan. Gazǵa qosýdy «ST LTD», «ST GAZ», «CK MÝSLIM», «AIаKS-78» jáne «SUŃQAR-2002» JShS-tary júrgizedi.
Jetisý oblysy
