Senattyń beıindik komıtetiniń qorytyndysynda kórsetilgendeı, zań jobasy Prezıdent Qasym-Jomart Toqaevtyń 2022 jylǵy 1 qyrkúıektegi Qazaqstan halqyna Joldaýy sheńberinde júktegen tapsyrmasyn oryndaý úshin ázirlengen.
Zań jobasynyń negizgi mindeti - 2022 jylǵy 4-7 qańtar aralyǵynda arandatýshylardyń yqpalyna túsken jáne jappaı tártipsizdikter jaǵdaıynda qylmystyq áreketter jasaǵan adamdardy, sondaı-aq qańtar oqıǵalary kezinde quqyqqa qarsy áreketterdiń jolyn kesý kezinde qylmystyq quqyq buzýshylyqtarǵa jol bergen quqyq qorǵaý organdary men áskerı organdardyń qyzmetkerlerin jazalaý merzimderin qysqartý jáne jazasyn óteýden bosatý.
Zań jobasy adamgershilik aktisiniń qoldanysyna jatatyn qylmystyq kodekstiń baptarynyń tizbesin, raqymshylyq jasaýdyń sharttary men tártibin kózdeıdi, sondaı-aq Úkimet pen jergilikti atqarýshy organdardyń bosatylatyn adamdardy jumysqa ornalastyrý, olarǵa áleýmettik jáne ózge de kómek kórsetý jónindegi sharalardy iske asyrý jónindegi quzyretin bekitedi.
Sondaı-aq qujatta qylmystyq teris qylyqtar, aýyrlyǵy az jáne ortasha qylmystar jasaǵan tártipsizdikterge qatysýshylarǵa qatysty qylmystyq isterdi toqtatý, osyndaı áreketter boıynsha sottalǵandardy jazadan bosatý, sondaı-aq osyndaı quqyq buzýshylyqtar úshin jazasyn ótegenderdiń sottylyǵyn alyp tastaý kózdelgen.
Aýyr qylmys jasaǵan adamdarǵa zań jobasynda sottar taǵaıyndaǵan jaza tórtten úshke, asa aýyr qylmystar – jartysyna qysqartylady.
«Bul rette terrorıstik, ekstremıstik, sybaılas jemqorlyq qylmystar, memleketke opasyzdyq, azaptaýlar jasaǵan, qylmystardyń qaıtalanýy nemese qaýipti qaıtalanýy kezinde, jappaı tártipsizdikter uıymdastyrǵan, kámeletke tolmaǵandardyń jynystyq tıispeýshiligine qarsy qylmystar jasaǵan adamdar raqymshylyq jasaýǵa jatpaıdy», delingen Senat qorytyndysynda.
Zań jobasyn qabyldaý teris áleýmettik-ekonomıkalyq jáne quqyqtyq saldarǵa ákep soqpaıdy, sondaı-aq respýblıkalyq bıýdjetten qosymsha qarjylyq shyǵyndardy talap etpeıdi.
Jalpy, ázirleýshilerdiń pikirinshe, jobany qabyldaý eldegi qoǵamdyq-saıası jaǵdaıǵa oń áser etedi.
Eske sala ketsek, 2022 jyldyń 1 qyrkúıeginde Qasym-Jomart Toqaev Qazaqstan halqyna Joldaýynda qańtar oqıǵalaryna qatysýshylarǵa raqymshylyq jarııalaǵan edi.
Bas prokýratýra raqymshylyqqa 1,5 myńǵa jýyq adam túsetinin habarlady.
