«Men sizge naqty merzim aıta almaımyn, óıtkeni birqatar is áli de aldyn ala tergeý organdarynyń óndirisinde jatyr. Aýyr jáne asa aýyr qylmystar týraly ister boıynsha tergeý sharalary tolyǵymen júrgiziledi. Is sotqa jiberiledi, sot bul isti qaraıdy jáne tek úkim shyǵarylǵan kezde ǵana sot raqymshylyq aktisin qoldanady. «Raqymshylyq týraly» zańda osyndaı norma bar, ýákiletti organdar alty aı ishinde barlyq uıymdastyrýshylyq sharalardy qabyldaýy tıis», dedi Áset Shyndalıev Senattyń jalpy otyrysynda.
Onyń aıtýynsha, sot mundaı isterdi bir aı ishinde qaraýǵa quqyly.
«Eger adamdy bas bostandyǵynan aıyrý úkimi shyǵarylsa, mekeme ákimshiligi nemese adamnyń ózi sotqa raqymshylyq jasaý aktisin qoldaný týraly ótinishhat jiberedi. Zań boıynsha sot ony bir aı merzimde qaraýy múmkin. Sodan keıin sot sheshim shyǵarady. Eger adam ortasha jáne jeńil ister boıynsha sottalǵan bolsa, ol jazadan bosatylady. Bul jaǵdaıda ol birden bosatylýy múmkin. Eger jaza merzimi qysqartylsa, onda ol qalǵan merzimin óteýi kerek», dep qosty Bas prokýratýra ókili.
