Búginde ýnıversıtet kampýsy shaǵyn qala keıpinde túrlenip keledi. QazUZÝ qalashyǵynda 7 ǵylymı-zertteý ınstıtýty, 29 ǵylymı ortalyq, 2 ujymdyq paıdalaný ortalyǵy, 125 ǵylymı jáne oqý zertteý zerthanalary ornalasqan. Munymen qosa «Keremet» qyzmet kórsetý jáne medısınalyq ortalyǵynda da stýdentter úshin qolaıly jaǵdaı jasalǵan.
Bıyl qalashyqtaǵy jataqhanalar jeńil jáne kúrdeli jóndeýden ótti. Zamanaýı talaptarǵa saı jaraqtalǵan №5 jataqhananyń ashylýyna ýnıversıtet basshylyǵy, oqytýshy-professorlar quramymen qatar qara shańyraqty ár jyldary bitirgen túlekter qatysty.
Ál-Farabı atyndaǵy QazUZÝ-dyń basqarma tóraǵasy – rektory Janseıit Túımebaev stýdentterdi jańa qonysymen quttyqtap, bes qabatty ǵımarattyń jaıymen tanystyrdy. Rektor atap ótkendeı, búginde 26 myń stýdent bilim alyp jatqan ulttyq ýnıversıtette 6 myń orynǵa arnalǵan jataqhana bar. Aldaǵy ýaqytta QazUZÝ qalashyǵynda taǵy da jańa ǵımarattar boı túzep, stýdentterdiń sapaly bilim alýymen qatar, shyǵarmashylyq damýyna da múmkindik jasalatyn bolady.
«QS jahandyq reıtınginde 150-orynda turǵan ýnıversıtettiń Ystanbul, Bishkek qalalarynda fılıaly ashylyp, endigi kezekte О́zbekstanda ashý josparda tur. Memleket basshysy óziniń saılaýaldy baǵdarlamasynda elimizdegi stýdentterdi jataqhanamen tolyq qamtamasyz etý mindetin qoıǵany belgili. Osy oraıda Prezıdenttiń Almatyǵa sapary barysynda stýdentterge qolaıly jaǵdaı jasaý maqsatynda ázirlengen QazUZÝ Bas jospary tanystyrylǵan bolatyn. Aldaǵy jyldarda qalashyqta taǵy da 10-nan astam jataqhana men áleýmettik nysandar salý kózdelip otyr», dedi rektor.
Búginde ýnıversıtette 3 myńdaı sheteldik stýdent bilim alýda. О́tken jyly 100-den astam sheteldik professor kelip sabaq berdi. Taıaý keleshekte osy kontıngentti kóbeıtip, qos dıplomdy baǵdarlamalardy jetildirý baǵytyndaǵy jumys jalǵasady. Búginde atalǵan oqý ornynyń Ispanııa, Fransııa, Reseıdiń oqý oryndarymen qos dıplomdy baǵdarlamalary jalǵasyn taýyp keledi.
Jýrnalıstıka fakýltetiniń dekany Nurjan Qýantaıuly ýnıversıtette oqımyn degen stýdentke jaıly jaǵdaıdyń bári jasalǵanyn jetkizdi.
«Jańa turpatty jataqhana zamanaýı bólmelermen ǵana emes, shyǵarmashylyq ortalyqtarmen de qamtamasyz etilip otyr. Oqý ornynda kásipodaq, jastar uıymdarynyń jumysy jataqhanadaǵy rýhanı mádenı keshterge ulasyp jatady. Ár senbi saıyn ótetetin ádebı keshter, Farabı klýby, Jaıdarman stýdenttik klýbtarynyń jastar belsendiligin arttyrýdaǵy yqpaly zor», dedi N.Qýantaıuly.
Jańa jataqhananyń turǵyny, jýrnalıstıka fakýltetiniń 1-kýrs stýdenti Hamza Erden óz áserimen bólise kelip: «Biz №5 jataqhanadan qazaq jýrnalıstıkasynyń tarıhy órbigen qasıetti mekenge qaıta oraldyq. Bul jataqhanada kóptegen zııaly qaýym ókili turǵan. Munda stýdentter jaıly ómir súrýi úshin barlyq jaǵdaı jasalyp otyr», dep atap ótti.
Sońǵy bes jylda №5 jataqhanada fızıka-tehnıkalyq fakýltet stýdentteri turyp kelgen bolatyn. Ýnıversıtet basshylyǵynyń atyna túlekter tarapynan jataqhanany jýrnalıstıka fakýltetine qaıta berý týraly usynys túskennen keıin, tıisti sheshim qabyldanyp, kúrdeli jóndeýden ótken jataqhana bolashaq jýrnalısterge qaıta paıdalanýǵa berildi. Búginde jýynatyn bólme, jıhazyna deıin jańarǵan jataqhana ınternet jelisine qosylyp, ár seksııaǵa zamanaýı dýsh kabınalary qoıylyp, sanıtarlyq-tehnıkalyq jabdyqtar aýystyryldy.
ALMATY
