Aıta ketsek, aýqymdy festıval Almaty qalasy ákimdiginiń qoldaýymen 2013 jyldan beri jyl saıyn ótkizilip keledi.
Jobanyń basty maqsaty - oqyrman mádenıetin damytyp, jazýshylar men olardyń oqyrmandary úshin biryńǵaı alań quryp, balalar men jastar arasynda kitapqa degen qyzyǵýshylyqty arttyrý.
«8 jyl ishinde Kitap Fest Almatynyń kitap súıer qaýymy úshin ǵana emes, barlyq qazaqstandyqtar úshin súıikti alańǵa aınaldy. 2019 jyly festıvaldi elordada ótkizdik jáne jyl saıyn múmkindikter shekarasyn keńeıtip, úzdiksiz damýǵa tyrysamyz. Jaqyn arada kitap festıvalin elimizdiń basqa qalalary men óńirlerinde de ótkizýdi josparlap otyrmyz, sebebi oǵan úlken qyzyǵýshylyq pen suranys bar», dedi Kitap FEST kitap festıvaliniń bas úılestirýshisi Maıra Áljanova.
10 saǵattyq Kitap FEST festıvaliniń mádenı baǵdarlamasynda - festıval qonaqtary kitaptarmen ózara almasýǵa, unaǵan kitaptardy jeńildikpen satyp alýǵa nemese olardy tolyǵymen tegin alýǵa múmkindik aldy. Bıylǵy kitap festıvalinde ár túrli janrdaǵy 3000-nan asa kitap tegin taratyldy.
Festıvalde 30-ǵa jýyq jazýshy, máselen Ermek Tursynov, Ásel Sapaqova, Lılıa Kalaýs, Konstantın Nagaev jáne basqa da kóptegen avtorlar ózderiniń jańa kitaptaryn tanystyrdy. Qalamgerler qazirgi ádebıettegi ózgerip jatqan tendensııa týraly óz oılarymen bólisti. «Oflaın kitaptar týraly» shatyrda tanymal balalar jazýshylary jáne blogerler qaýymy óz tájirıbelerimen bólisti. Kitap jármeńkesinde kitap dúkenderi, baspagerler jáne ınternet-dúkenderi óz ónimderin kórmede 20%-ǵa deıingi jeńildikpen satty. Balalarǵa arnalǵan oıyn-saýyq baǵdarlamasy aıasynda anımatorlar, teatr qoıylymdary, sheberlik synyptary, akvagrım men túrli qyzyqty baıqaýlar kelgen qonaqtarǵa tamasha kóńil-kúı syılady.
Festıval sheńberinde alǵash ret «Aýylǵa kitap» aksııasy ótkizildi, onda kez-kelgen oqyrman óz kitabyn ákelip, Qazaqstannyń aýyldyq kitaphanalaryna tapsyrýǵa kómektesti.
Qazaqstandyq belgili jazýshy jáne ssenarıst Lıla Kalaýs Batý men onyń dostarynyń shytyrman oqıǵalary týraly jańa kitabyn usyndy. Jazýshynyń pikirinshe, Kitap Fest shyǵarmashylyq kezdesýler úshin bedeldi jáne qýatty alańǵa aınaldy.
«Qazaq tildi kitaptardyń assortımenti keńeıip kele jatqany qýantady. Sońǵy jyldary kóp týyndy qazaq tiline aýdaryldy. Qazaq tilindegi kitaptardyń kóptigi óte jaqsy, biz óte durys baǵytta kele jatyrmyz», deıdi jazýshy.
Festıvalde «Mama, qazaqsha sóıleshi» orys-qazaq sózdiginiń jáne qazaq tilindegi balalardy damytý kitaptarynyń avtory Ásel Sapaqova balanyń jeke basynyń damýyndaǵy ádebıettiń róli týraly aıtyp berdi.
«Uıymdastyrýshylarǵa osyndaı keremet is-shara úshin alǵys aıtqym keledi. Bıyl festıvalde halyq sany kóp boldy, bizdiń maqsatty aýdıtorııamyzdyń kóp bóligi keldi desek te bolady. Barlyq kitaptar derlik satyldy. Osyndaı sharalardyń órkendeýin jáne kitapsúıer qaýymnyń qatary artsyn dep tileımin», dep atap ótti jazýshy.
