«Oblys turǵyndaryn mazalaıtyn taǵy bir másele – kommýnaldyq qyzmettiń sapasy. Qazir Aqtaý qalasynyń ınjenerlik júıesiniń 75 paıyzy eskirgen. Úkimetke oblys ortalyǵynyń ınjenerlik júıesin qaıta jabdyqtaýǵa qajetti qarajat bólýdi tapsyramyn. Aqtaý qalasyndaǵy qurylys máselesine arnaıy toqtalǵym keledi», dep atap ótti Prezıdent Mańǵystaý oblysynyń jurtshylyǵymen kezdesý barysynda.
Sondaı-aq Memleket basshysy oblys ortalyǵyndaǵy eski úılerdiń máselesi tez arada sheshimin tabý qajet ekenin aıtty.
«Biz Aqtaý qalasyn elimizdiń basty týrızm ortalyǵynyń biri retinde damytýdy kózdep otyrmyz. Teńiz jaǵasyndaǵy qala qazirgi zamanǵy ozyq talaptarǵa saı bolýǵa tıis. Oblys ortalyǵyndaǵy eski úılerdiń máselesin sheshý qajet. Qalada mundaı 280 úı bar. Úkimetke Aqtaý qalasyndaǵy turǵyn úılerdi jańǵyrtý jóninde arnaıy baǵdarlama ázirleýdi tapsyramyn», dep qosty Qasym-Jomart Toqaev.
Prezıdent Jańaózendi keshendi damytý maqsatynda 580 mıllıard teńgeden astam qarajat bólingenin atap ótti.
«Jańaózendi keshendi damytý máselesine basa nazar aýdarý qajet. Ondaǵy kúrdeli túıtkilderdi sheshýge 580 mıllıard teńgeden astam qarajat bólindi. Bul – bir qala úshin qomaqty qarjy. Ony maqsatyna saı tıimdi jumsaý qajet. Jalpy, oblys ákimdiginiń Jańaózendi damytý úshin qabyldap jatqan sharalary tolyq oryndalýǵa tıis. Áleýmettik mańyzy bar jobalardy sozbalańǵa salmaı der kezinde iske asyrý qajet», dep túıindedi Qasym-Jomart Kemeluly.
