«Jalpy, qoǵamymyzda zań men tártiptiń ústemdigi bolýy qajet. Basqa jolmen eshqandaı jumys tabysty bolmaıdy, tek bos sóz ben jalǵan urandardyń astynda qalamyz. Árbir áleýmettik máseleni qanshalyqty kúrdeli bolsa da, ásire saıasılandyrýdyń qajeti joq. Biz bárimiz bir memleket bolyp, bir qoǵam bolyp kez kelgen túıtkildi sheshe alatynymyzǵa eshqandaı kúmán bolmaýǵa tıis», dedi Memleket basshysy.
Budan soń, ol qazaq qaı zamanda da úlkenin syılaǵan, aqsaqaldardyń ataly sózine toqtaǵanyn eske saldy.
«Aýzy dýaly qarttarymyz árdaıym eldiń uıytqysy bolǵan. «Qarııasy bar eldiń qazynasy bar» degen sóz sodan qalǵan. Biz halqymyzdyń ıgi dástúrleri men qazirgi zamannyń talaptaryn úılestire bilgenimiz abzal. Osy oraıda, men Aqsaqaldar keńesiniń jumysyn jandandyrý kerek dep sanaımyn.
Shyn máninde, el ishinde jastarǵa aqyl-keńesin aıtyp, durys jol silteıtin danagóı qarııalarymyz az emes. Aqsaqaldarymyz óskeleń urpaqty tárbıeleýge, el birligin saqtaýǵa atsalysyp, ortaq iske zor úles qosary anyq. Aqsaqaldar keńesi barlyq aımaqta birdeı belsendi emes», dedi Prezıdent.
Osy rette ol Aqsaqaldar keńesiniń jumysyn júıelep, jandandyrý keregin aıtty.
«Bálkim, keńesterdi Assambleıanyń janyna toptastyrý durys bolar edi. Olardyń bedelin kóterip, mártebesin arttyrý qajet. Budan esh utylmaımyz», dedi Q.Toqaev.
