Bilýimizshe, bul – qazaq dýblıajynyń tabysty qadamynyń biri. Qazaqshasy múltiksiz desek, artyq aıtqandyq emes. Keıipkerlerdi sóıletkenin bylaı qoıǵanda, kúlgeni, demikkeni, yshqynǵany – bári qazaqy ún ereksheligimen úılesip-aq tur. Oǵan basty sebepker bolyp, qolǵa alǵan – Mádenıet jáne sport mınıstrligi men «Melomen» jáne «Araı medıa grýpp» shyǵarmashylyq ujymynyń birlesken eńbegin atap ótken jón. Fılmniń qazaqsha nusqasynyń kórsetilimine qatysqan Mádenıet jáne sport mınıstri Dáýren Abaev álemdik deńgeıdegi sapaly kontentti qazaqshalaýda aýqymdy jumystar atqarylyp jatqanyn jetkizdi.
«Qazaq tilindegi kınokartınalarǵa suranys artyp keledi. Halyqqa reıtıngi joǵary fılmderdi qazaq tilinde kórsetý – ıdeologııalyq turǵydan da asa mańyzdy. Osy maqsatta biz gollıvýdtyq jańa týyndylardy ana tilimizge dýblıajdaý boıynsha arnaıy jobany qolǵa alǵan edik. Tilge degen eń úlken qoldaý – ony qoldaný. Búginde ana tilimizde sóıleıtin jastar da, ony úırengisi keletin ózge ult ókilderiniń de qatary artyp keledi. Sondyqtan qazaqtildi kontentti birge damytaıyq», dedi Dáýren Áskerbekuly.
Osy blokbasterdi eseptegende MARVEL stýdııasynyń jetinshi fılmi qazaqsha dybystalyp, kórermenge jol tartyp otyr eken. Buǵan deıin osy taqylettes «Avatar» sııaqty fantastıkalyq dúnıeler aýdarylypty, endi myna «Qara Qabylan» qazaqsha «kisen ashty». Sonda bizdiń «Er Tóstik», «Qobylandy» syndy ertegi, epostarymyz qaıda qaldy?.. Olar da tap osy dúnıeler syndy aspan, jerústi, jerasty álemderiniń ómirinen syr shertetin qaharmandyq rýhtaǵy ǵajaıyptar emes pe? Akademık Seıit Qasqabasovtyń ertegi-mıfter týraly eńbegin oqyp, tushynǵan kásibı kıno mamandary fantastıkalyq blokbasterdiń atasy qazaq ertegi-mıfterinde ekendigin aıqyn biler edi. Máselen, «Er Tóstikte» jer astyndaǵy Jylan Bapy han patshalyǵy. Tóstiktiń oǵan túsýi, Shalquıryqtyń bir tal qylyn órtegende jetip keletin ǵalamat detaldar – bári tunyp turǵan qııal-ǵajaıyptar, áli bolmaǵan, túsirilmegen blokbaster emes pe? Týra sol sııaqty, myna «Qara Qabylanda» da Afrıkadaǵy dúnıede bolǵan, bolmaǵany belgisiz patshalyqtar áleminiń taǵajaıyptarynan syr shertiledi. Bizdiń dáýirimizge deıingi kóne patshalyqtardyń shaıqastary búgingi tehnokrattyq zamanmen baılanysty órbıdi. Demek, ertegi-mıfterdegi túpsana ólmeıdi.
Máselen, qara qabylan kónedegi Vakanda eliniń kıesi men qorǵaýshysy ispetti. Fılmde T’Challa patshanyń qazasynan keıin Ramonda patshaıym taq murageri jalǵyz qyzymen qalady. Olardyń qolyndaǵy ǵalamat «Vıbranıým» álemdegi AQSh sııaqty alpaýyt memleketter qol suǵa bastaıdy. Osy kezde tarıh sahnasyna bizdiń dáýirimizge deıin jasaǵan sýasty eliniń ámirshisi Nemord shyǵady. Bular ózara sharpysqanda, aralarynda nebir ǵalamattar qylań beredi. Kóne dúnıe men osy zamannyń arasy bir-aq qadam. Demek, bolashaq ta sol ekeýinen bastaý alady.
Jahan sumdyq kóretin Amerıka halqy adaspas úshin osyndaı qadamdarǵa baryp jatyr, tipti túp-tamyrynda ondaı dúnıeler bolmasa da, ózderi joıyp jibergen órkenıetterdi tiriltip, halqynyń tanymyna beıimdeýde. Al bizdiń baba tanym saırap tur, tek búgingimen sabaqtastyryp, kıno tiline kóshirse jetkilikti.
