«Jaıly mektep» ulttyq jobasyn júzege asyrýǵa 2,6 trln teńge bólinedi. 2026 jylǵa qaraı qalalar men eldi mekenderde keminde 800 myń oqýshy jańa bilim shańyraǵynda tálim alady dep kútilýde. 2023-2025 jyldar aralyǵynda ulttyq joba úshin bıýdjetten 2 606 596 055 myń teńge bólý josparlanýda. Onyń ishinde 646 535 206 myń teńge – Ulttyq qor qarajaty esebinen jáne 1 960 060 849 myń teńge respýblıkalyq bıýdjet esebinen ıgerilmek.
Kerbulaq aýdanynyń Mádeıet úıinde ótken jıynda ıne shanshar oryn bolǵan joq. Aýyl-aýyldardan jınalǵan muǵalimder jańa oqý jylyndaǵy ózgeristerdi mınıstrdiń óz aýzynan estidi. Esep berý kezdesýi eki saǵatqa sozyldy. Vedomstvo basshysy atqarylyp jatqan jumystary jaıynda aıtyp, aýyl turǵyndarynyń suraqtaryna jaýap berdi. Ata-analardy, áriptes muǵalimderdi, mektep dırektorlaryn alańdatqan máseleler, ıakı muǵalimderdiń saǵat júktemesi, dırektorlardyń rotasııasy, túlekterdi jumysqa ornalastyrý, mektepterdiń áleýetin arttyrý, kolledj bilimine granttardy bólý tetigi týraly keńinen baıandady.
«Buǵan deıin mektepterde pedagog-assıstent laýazymyn engizgen edik. Búgingi tańda maman sany 1 500 adamnan asty. Balabaqshalarda da tárbıeshi-assıstent qyzmeti engizilý týraly naqty usynystar qarastyrylyp jatyr», dedi A.Aımaǵambetov.
Esep berý kezdesýinen keıin mınıstr Saryózek aýylyndaǵy Kúreńbel mektebi men «Aı-Sana» balabaqshasyna bardy. 900 orynǵa eseptelgen mektepte 875 bala oqyp jatyr. Birinshi kezekte ol qaýipsizdik jumysynyń qalaı uıymdastyrylǵanyn, beınebaqylaý kameralarynyń jáne «dabyl túımeleriniń» jumysyn baqylady. Tipti dabyl túımesin basyp, mektepke jedel jetken polısııa qyzmetkerlerimen de tildesti. Olarǵa oqýshylardyń qaýipsizdigi óte mańyzdy ekenin jetkizdi.
Sonymen qatar oqý kabınetterin, kitaphana men ashanany da aralady. Ustazdarmen ashyq sóılesip, sanat berý, eseptilik, UBT ótkizý máselelerin talqylady. Jalpy bilim berý nysandaryn aralaǵanda anyqtalǵan eskertýler boıynsha aýdandyq bilim basqarmasynyń basshysyna olardy joıýǵa tapsyrma berildi.
Jetisý oblysy
