Japon tekti 100 000-nan astam adam óz úılerinen qýylyp, qańyrap bos qalǵan túrmege qamalady. Oqıǵa osy tustan ári qaraı órbıdi. Solardyń ishinde túrme lagerine qamalǵan on tórt dostyń jáne olardyń otbasylarynyń basynan keshken oqıǵalary kózben kórgendeı shynaıy baıandalady. Kitaptyń ár taraýy ártúrli jasóspirimderdiń kózqarasyn sıpattaıdy, olardyń jasy ósken saıyn, ýaqyt alǵa jyljyǵan saıyn oqıǵa hronologııalyq túrde damyp otyrady. Jazýshy keıbir oqıǵanyń bir bóligin aıtý arqyly ózindik erekshe ádis taba bilgen. Bul shyǵarma New Yor Times-tyń bestseller kitaptarynyń tiziminde tur.
Romannyń birinshi bóliminde jasóspirimder San-Fransıskodaǵy Japantaýnnyń bir aýdanynda turady. Keıbireýlerin aq násildiler qýdalap, «elińe qaıt» dep keýdesinen ıteredi, satqynsyńdar dep aıyptaıdy. Bul shyn máninde, Batys qoǵamyndaǵy emıgranttardyń basynan ótkizgen san túrli oqıǵalarynyń bir parasy ǵana dersiz.
Aldynan nebir qıyndyqtar kezdesse de, armanshyl jastar keri qaıtpaıdy. Alǵa júre beredi, ómirdi ári qaraı jalǵastyrady. Tipti eshteńeden taısalmaı, keıde kóńil kóterý úshin softbol jáne beısbol komandalaryn qurady, jaqyn mańdaǵy qaýymdas komandalarmen qarsy oıyndar oınady. Qalaı bolsa da, olardyń is-áreketterinen Amerıkaǵa degen adaldyq menmundalaıdy.
Shyǵarmanyń shynaıy da nanymdy sýrettelýiniń bir sebebi avtor Treısı Chıdiń keı týystary da sol lagerde qamalýy bolsa kerek. Shyndyqtan tysqary eshteńe joq. Biz ótken dáýirdegi tarıhı oqıǵalardy burmalaıtyn aq qaǵazǵa túsirsek, sonyń ózi tarıh úshin úlken jetistik bolmaq. Olaı bolmasa, onda tarıhtyń qaıtalaný zańdylyqtaryn túsiný qabiletimizdi joǵaltamyz. Biraq shyndyq pen tarıh qatar júrse, kórkem shyǵarmanyń ózegi de, oqyrmanǵa bereri de mol bolary daýsyz. Mınnoý – osy romandaǵy basty keıipker. Ol aınalasyndaǵy túrli qoǵamdyq qubylystarǵa nazar salyp, erterek eseıýdi oılaıdy. Bul Amerıka tarıhyndaǵy qaıǵyly kezeńniń áserli oqıǵasy.
Bir sózben aıtqanda, bul roman tózimdilik týraly áńgimelerdiń jıyntyǵy. Adam balasynyń myna ómirde myńdaǵan, mıllıondaǵan kúresterde jeńip baryp azattyqqa, erkin ómirge, bárimiz izdep júrgen baqytqa qol jetkizetinin aıtqysy kelgen tamasha týyndynyń biri de osy.
Kitaptyń sońynda avtor osy shyǵarmasy týraly: «1942 jyly Perl-Harbor bombalanǵannan keıin Amerıka Qurama Shtattarynda japondarǵa qarsy basqasha kóńil kúı paıda boldy, meniń ata-ájem úıinen qýylyp, júz myńnan astam japondyqtar qamalǵan túrme lagerinde otyrýǵa májbúr boldy. Áý bastan bul oqıǵa meniń otbasyma qatysty ekenin bildim, óıtkeni bul tarıh – meniń tarıhym», dep jazady. Jazýshynyń osy sózinen keıin biz bul kitaptaǵy oqıǵanyń shynaıy ómirde bolǵanyn, avtor óz otbasynyń basynan ótken aýyr taǵdyrdy roman etip jazǵanyn túsindik. Ol bul romanyn jazý arqyly AQSh-taǵy japondyqtardyń qandaı qıyn kúnderdi ótkizgenin jańa urpaqqa túsindirgisi kelgen sııaqty.
