«Búgin, 17 qarashada búkil álemde Halyqaralyq shala týylǵan náresteler kúni atap ótiledi. Qazaqstanda neonatologtardyń quzyrettiligi men otandyq ortalyqtardy jańa jabdyqtarmen qamtamasyz etýdiń arqasynda balalardy ońaltý joǵary deńgeıde ótýde. Jyl saıyn álemde 15 mıllıon sábı merziminen buryn dúnıege keledi. Qazaqstanda jyl saıyn 22 myńǵa jýyq osyndaı sábı týylady, neonatologtardyń jumysynyń arqasynda balalardyń ómir súrý kórsetkishi artyp, búginde 70-80% jetip otyr», dep jazdy mınıstrliktiń baspasóz qyzmeti.
Shala týǵan balalar kúni alǵash ret Venada 2009 jyly atap ótilgen. Bir jyl buryn, 2008 jyly Qazaqstan Dúnıejúzilik densaýlyq saqtaý uıymynyń shala týǵan nárestelerdi kútý jónindegi baǵdarlamasyna qosyp, soǵan sáıkes respýblıkada 2008 jyldan bastap tiri týylý krıterııleri engizilgen. Ol boıynsha júktiliktiń 22-aptasynda dene salmaǵy 500 gramm jáne odan da kóp týylǵan nárestelerdi kútý qarastyrylǵan.
«2022 jyldyń 9 aıynda elimizde 299 711 sábı dúnıege keldi, olardyń 16,3 myńy merziminen buryn týylǵan sábıler. Shala týylǵan nárestelerdiń ómir súrý kórsetkishin jaqsartý úshin Qazaqstanda DDSU usynǵan jáne dáleldi medısına qaǵıdattaryna negizdelgen ókpe tininiń jetilýine arnalǵan jańa tehnologııalardy jáne zamanaýı dıagnostıkalyq jáne emdeý apparatýrasy men dárilik zattardy paıdalana otyryp, jańa týǵan nárestelerdi reanımasııalaý jáne qarqyndy terapııa ádisteri engizilip, úzdiksiz damýda», dep qosyp ótti mınıstrlik ókilderi.
Vedomstvo málimetinshe, Qazaqstanda 39 perınataldyq ortalyq jáne 2 respýblıkalyq deńgeıdegi akýsherlik uıym jumys isteıdi, olarda jańa týǵan nárestege der kezinde medısınalyq kómek kórsetý jáne qajet bolǵan jaǵdaıda bosanǵannan keıingi alǵashqy kúnderi hırýrgııalyq aralasý jasaý úshin áıel bosanǵanǵa deıin aýrýhanaǵa jatqyzylady.
Sondaı-aq balanyń aýrýlaryn erte dıagnostıkalaý maqsatynda, týylǵannan keıin birden perzenthanada tuqym qýalaıtyn metabolıkalyq aýrýlardy erte anyqtaýǵa baǵyttalǵan jáne fenılketonýrııa men týa bitken gıpotıreozǵa tekserýdi qosa alǵanda, neonataldy skrınıng júrgiziledi.
Dene salmaǵy óte tómen týylǵan balalarda (2500 g-nan az) shala týylǵan nárestelerdiń retınopatııasyna skrınıng júrgiziledi, odan keıin neǵurlym erte merzimde hırýrgııalyq emdeý júrgiziledi.
«Elimizde balalardyń densaýlyǵyn jaqsartý, sondaı-aq náreste ólimin azaıtý úshin birqatar júıeli sharalar júzege asyrylýda. Atap aıtqanda, aýrýlar men damý buzylystaryn ýaqtyly anyqtaý úshin jyl saıyn 3,1 mıllıonnan astam balany, skrınıngtik tekserýler – 1,6 mıllıonnan astam jas balalardy qamtıtyn profılaktıkalyq tekserýler júrgiziledi. Erte jastaǵy balalarǵa kútim jasaý máseleleri boıynsha keńes berý úshin 1500-den astam balany damytý kabıneti uıymdastyrylǵan», dedi mınıstrliktiń baspasóz qyzmeti.
