Mádenıet jáne sport mınıstrliginiń qoldaýymen kórermenin qýantar qoıylymda kompozıtor Radık Salımov, kostıým sýretshisi ári sýretshi-ssenograf Zlata Sırsens, jaryq sýretshisi Alekseı Markov jáne «Astana Balet» ártisteriniń jarqyn ónerin tamashalaýǵa bolady. Bı óneriniń qudiretimen sahnada bala kezden tanys beınelerge jan bitedi. Antýrajy ózge qalypta bolǵanymen, olardy taný qıyn emes. Balette ertegi keıipkerleri jańa qyrynan tanylyp, sahnada mýzyka, qımyl, san alýan tyń boıaýlardyń úılesiminen týǵan ǵajaıyp álemge tap bolatynyńyz anyq.
– Qazirgi balalar qorshaǵan ortany jyldam qabyldap, boıyna sińiredi. Eresekterdiń mindeti – osy álemniń ásem tustaryn kórsetý. Meniń oıymsha, ertegi – ómirdiń sol tańǵajaıyptaryn taný jolyndaǵy alǵashqy saty. О́z basym ǵajaıyp álemdi elestetemin. Munda jaqsylyq zulymdyqty jeńip, ádildik saltanat qurady. Al adam balasynyń boıyndaǵy nápsisi tyıylyp, aqyry týra jolǵa qadam basyp, álem sheksiz mahabbat shapaǵatyna bólenedi. Meniń jańa ertegim osy jaıly», degen rejısser Georgıı Kovtýnnyń oıyn teatr ártisi Aıdyn Qaljan shabyttana jalǵady: – Bul qoıylymda, jaqynyna alańdaǵan keıipkerdiń kúızelisi ǵalamat sán-saltanatqa ulasyp jatady. Sen de balet keıipkerlerimen birge bala kezden tanys ertegini óz basyńnan ótkizgendeı kúı keshesiń. Menińshe, bul balet eresekterge de, balalarǵa da áser etip, qystyń súreńsiz tirshiligine bir sáýle túsiredi. Ǵajaıyp mýzyka, ásem kostıýmder men ǵalamat dekorasııalar balalarǵa túsinikti tilde máńgilik adamı qundylyqtar jaıly baıandap beredi.
Iá, bı tili qudiretiniń arqasynda bala kezden tanys Qar patshaıymy men Gerda týraly ertegige jan bitip, óziniń sheksiz mahabbaty arqyly baýyrynyń muz basqan júregin jibitip, Qar patshaıymynyń arbaýynan arashalap qalǵan qaısar qyz ómirinen syr sherter qoıylymnyń kórermenine syılar keremet áserimen qatar, berer taǵylymy da mol. Spektaklde teatrsúıer qaýym jaqsylyq zulymdyqty jeńip, shynaıy mahabbat bar jerde árdaıym ádildiktiń ústemdik quratynyna kóz jetkizedi.
«Qar patshaıymy» – kúlli otbasymen birge tamashalaıtyn, ár sahnasy qyzyqty rejısserlik jáne kórkem sheshimderge baı qoıylym. Qııal-ǵajaıyp hıkaıanyń júrekti elitip áketer atmosferasy ásem kostıým ári utqyr dekorasııalarmen sátti úılesip, kórermen qaýymdy naǵyz ertegiler eliniń sıqyr men qııal álemine elitip áketeri sózsiz.
