Qasqyr

Adaldyq degen uǵymdy estigende ıt pen qasqyrdy mysalǵa alýǵa asyǵamyz. Ne­ge? Sebebi ıt ıesine, bóri Tá­­ńirisine bas ıedi. Tabıǵat­tyń zańy solaı. Muny sýretshiniń shyǵarmasynan ańǵarýǵa bolady. Ol bes jasynda qo­lyna qyl­qalam ustady. Tańǵa­lar­lyǵy sol, týǵannan sýret sa­lyp júrgen jandaı árbir beıneni aınytpaı kóshirdi. Ol bir ańyzǵa bergisiz áńgime.

Balalarmen aýlada oınap júrgen kishkentaı Mark úıdiń qasyndaǵy fermanyń shatyryna shyǵýǵa bekinedi. Ondaǵy oıy ata-anasynyń nazaryn ózine aýdarý edi. Osylaısha, ol shatyr ishindegi úıshikten ártúrli boıaý quraldaryn taýyp alady. Qylqalamdy qolyna alǵanda izdegen zatyn tapqan jandaı alasurady. Qabyrǵany shımaqtaǵan baladaı aq qaǵazdyń betin qan-josa etedi.

Jeti jyldan keıin, ıakı on eki jasynda birinshi tolyq­qandy kartınasyn ómirge ákeldi. Bul sheberdiń ózi aıt­qandaı, peızaj bolatyn. Áıt­se de alǵashqy bastamalar peızaj úshin tym jasyl bolyp kórindi. Taǵy úsh jyl sheberhana ishinde oıyn pisirdi. Sóıtip, 15 jastaǵy bolashaq ataqty sýretshi akrıl boıaýlarynyń jıyntyǵyn usyndy. Bul – «Qasqyr» kartınasy edi.

Ol beınelegen peızaj jýr­naldyń muqabasynan tabyldy. Bul oqıǵa ony shabyttandyra tústi. Tipti sol kúnnen bastap, kúnine 14 saǵat sheberhanada tapjylmaı sýret saldy. Keıin sýretker Ońtústik Afrıkadaǵy týys­tarymen birge turýǵa májbúr bolady. Áıtse de jańa qonys oǵan surapyl shabyt syılady. Kartınalary satyldy, naǵyz kásibı sýretshi mártebesine ıe boldy. Biraq týǵan jerge degen mahabbaty kókeıine muń uıalata berdi.

Keneptegi qasqyr – bul sýretshiniń ózi. Ony qorshap turǵan peızaj Amerıka! Áıt­kenmen, qylqalam sheberi bul kórinisti oıdan quraǵan. Tek bala kúninde ákesi aıtqan áń­­gime sebep bolsa kerek. Ol – qas­qyrdyń jabaıy ta­bı­ǵat­tyń jarshysy ekendigi.