Apatty joıý jónindegi shtab basshysy – QR Premer-Mınıstriniń birinshi orynbasary Roman Sklıardyń sheshimimen 5A shaǵyn aýdanynda jańadan jalpy uzyndyǵy 120 metr jylý qubyry salynady.
«Bul oramdaǵy jelilerde zaqymdanýlar kóp kezdesýi sebepti belgili bir ýchaskede jańadan jeli salýǵa sheshim qabyldandy. Shtab qubyrdy jerdiń betimen tóseýdi qup kórip otyr. Osylaısha bul jerdegi magıstralge qosylǵan úılerdi jylýdan ýaqytsha ajyratý kóp ýaqytty almaıdy, nebári 5 saǵatty quraıdy. Mamandar eseptegendeı, eger jerdiń astymen júrgizsek, turǵyn úılerdi shamamen 20 saǵattaı jylýdan aıyrýǵa týra keler edi. Sebebi jerdiń astynda buǵan deıin paıdalanylǵan qubyrlardy tolyqtaı kesip alý qajet bolady. Qazir daıyndyq sharalary bastalyp ketti», dep habarlady búgin keshki saǵat 20.00-de Pavlodar oblysy ákiminiń mindetin atqarýshy Oleg Krýk.
Atap óterligi, qazirgi ýaqytta jylýǵa qosylmaǵan 6 podezd ǵana qaldy. Ol Máshhúr Júsip kóshesi, 52-úıde ornalasqan. 20 podezden turatyn úıdiń 14 podezindegi páterlerdiń qubyryna qazir jylý jiberildi. О́zge páterlerdi retteýdi erteń tańerteńgi 8.00-ge deıin aıaqtaý josparlanyp otyr.
Jalpy jóndeý brıgadalary Sátbaev kóshesi, №8 jáne Máshhúr Júsip kóshesi, №52-turǵyn úılerge jylý kirgizýde úlken qıyndyqtarǵa urynypty. Sebebi mundaǵy barlyq páterlerdiń jylý batareıalary men ishki qubyrlary aıazda tolyqtaı qatyp qalǵan.
«Ortalyq-Azııa Elektroenergetıkalyq Korporasııasy» (OAEK) AQ basqarma tóraǵasy Baǵdat Oraldyń sózinshe, kompanııa apatty qalpyna keltirý sharalaryna qazirdiń ózinde 891 mln teńge bólgen. Apat aımaǵynda bolǵan úıler boıynsha qarasha jáne jeltoqsan aılary úshin jylý tólemaqysy qaıta esepteledi.
Ekibastuzdaǵy jylý jelileriniń - 91, sý qubyrlarynyń - 66, káriz júıesiniń 60 paıyzdan astamy tozyp tur. Tek jylý jelileri boıynsha kónergen aýmaqtardyń 30 paıyzyn jańartý úshin keminde 120 mlrd teńge qarajat qajet kórinedi. «OAEK» bul rette bıýdjet qarajatynan dámelenip otyr.
