8 maýsymda elimizde jeńil ónerkásip qyzmetkerleriniń kúni atalyp ótedi

ASTANA. 5 maýsym. Aldaǵy 8 maýsymda elimizde jeńil ónerkásip qyzmetkerleriniń kúni atalyp ótedi. Osy ataýly kúnge baılanysty búgin elordada «Astana qalasy Qazaq sańyraýlar qoǵamynyń oqý-óndiristik kásiporyny» mekemesinde sala  qyzmetkerlerin quttyqtaý sharasy boldy. Bul týraly egemen.kz tilshisi habarlady. Quttyqtaý jıynyna Indýstrııa jáne jańa tehnologııalar mınıstrligi О́nerkásip komıtetiniń tóraǵasy Baqtybaı Qasymbekov qatysyp, salaǵa eńbegi sińgen qyzmetkerlerdi marapattady. Osydan úsh jyl buryn Elbasynyń jarlyǵymen bekitilgen «Jeńil ónerkásip qyzmetkerleri kúni» osy maýsym aıynyń ekinshi jeksenbisi bolyp belgilengen edi. Odan bir jyl buryn údemeli ındýstrııalyq-ınnovasııalyq damý baǵdarlamasynyń aıasynda jeńil ónerkásipti órkendetý baǵdarlamasy da jasalyp, maqsatty júzege asyryla bastaǵany málim. Komıtet tóraǵasy eldegi jeńil ónerkásip salasynyń damý úrdisteri týraly áńgimelep, ındýstrııalandyrý baǵdarlamasynyń alǵashqy bes jyldyǵynda atqarylǵan is-sharalarǵa toqtaldy. Qazirgi ýaqytta respýblıkada 1,5 myńnan astam jeńil ónerkásip kásiporyndary jumys isteıdi, onyń 97 paıyzyn shaǵyn jáne orta kásiporyndar quraıdy. Olarda negizinen názik jandylar jumys isteıdi eken. Respýblıkada 800 myńnan astam shaǵyn jáne orta kásiporyndar jumys istese, onda 2,4 mln. adam eńbek etedi. Atalǵan sektorda óndiris kólemi sońǵy 4 jylda 1,6 mlrd. teńgeden 8,3 mlrd. teńgege deıin ósken. Merekelik sharada Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshevtiń alǵys hattarymen salanyń 18 qyzmetkeri, al О́ndiris komıteti tóraǵasynyń alǵys hattarymen 35 jumysker marapattaldy. Nurbaı Elmuratov. Derekkóz: egemen.kz. Foto: alashainasy.kz.