Saltanatty bezendirilgen teatrdyń bas zalynda festıval prezıdenti Ardaq Ámirqulov pen baǵdarlama dırektory Gúlnar Ábikeeva quttyqtaý sózimen halyqaralyq is-sharanyń shymyldyǵyn túrdi. Mádenıet jáne sport mınıstri Dáýren Abaevtyń qatysýshylarǵa shyǵarmashylyq jetistik pen jemisti jıyn, jaqsy kóńil kúı tilegen kirispe sózinen soń «Eýrazııa» baıqaý baǵdarlamalaryna qatysatyn barlyq fılmdi qamtıtyn treıler kórsetildi.
Sondaı-aq kórermender qazylar alqasynyń múshelerimen tanysty. Bir qyzyǵy, sahnaǵa shyqqan sheteldik qonaqtar aldymen qazaq tilinde kem degende eki aýyz sóz aıtyp, ultqa degen óz qurmetin bildirýge tyrysyp jatty.
Saltanatty is-sharanyń basty tosynsyıy – festıvaldiń arnaıy júldeleriniń tabystalǵany. «Ortalyq Azııa kınematografynyń damýyna qosqan úlesi úshin» júldesin ataqty ózbek rejısseri Álı Hamraev ıelendi, ol osy festıvalde halyqaralyq baıqaýdyń qazylar alqasyn basqarady. 85 jastaǵy ózbek kınosy sheberiniń sahnada tolqyp turyp aıtqan lebizi kópshilikti tebirentpeı qoımady: «Búgin Qazaqstan jerine mereke keldi – álemdik kıno ókilderi sizderdiń shańyraǵyńyzda qonaqta. Menińshe, qıyn kezeńde basqa halyqtardy qushaǵyn ashyp qarsy alatyn adamdar keremet! Eń bastysy, «Eýrazııa» festıvali ómir súredi. Biz ony saǵyndyq. Festıvalge jáne Qazaqstanǵa sáttilik!»
Taǵy bir arnaıy syılyq – «Qazaq kınematografyna qosqan úlesi úshin» – mádenıettanýshy jáne qoǵam qaıratkeri Murat Áýezovke tabystaldy.
Festıvaldiń ashylý saltanatyna deıin alǵashqy baspasóz máslıhaty ótip, bıylǵy aýqymdy mádenı is-sharanyń jańalyqtary atalyp ótti. Gúlnar Ábikeevanyń aıtýynsha, bıylǵy festıvalge belgili kıno sańlaqtarynan túzilgen qazylar alqasy tórelik etedi. О́tken jyldarmen salystyrǵanda baǵdarlama mazmuny da baıytylyp, jan-jaqty sıpat ala bastady. «Eger ótken kezeńde «Dınamıkaly damyp kele jatqan qazaq kınosy», sodan keıin «Dınamıkalyq qazaq kınosy» baǵdarlamalary bolsa, qazir bizdiń kınematograf halyqaralyq baıqaýmen teń jeke ulttyq konkýrs ótkizýge múmkindik beretin deńgeıge jetti. XVI «Eýrazııa» kınofestıvaliniń basty ereksheligi men jańalyǵy – osy».
Baıqaý baǵdarlamalary deńgeıiniń óskeniniń bir dáleli – báıgege qatysatyn tórt kartınanyń óz elderinen «Oskar» syılyǵyna usynylǵandyǵy. Sonymen qatar festıvalde birden tórt álemdik premera ótedi.
Negizgi is-sharamen qatar Kınopark, Forum kınoteatrynda fılm kórsetilimderi bastaldy. Halyqaralyq baıqaýdan «Il Boemo» (Chehııa – Italııa – Slovakııa; rejısser Petr Vaslav) jáne «Áıel» (Qytaı; rejısser Van Chao) fılmderi kórsetildi. Ulttyq baıqaýdan – «Taý pııazy» (rejısser Eldar Shıbanov), «Zere» (rejısser Dáýren Qamshybaev) jáne «Ot» (rejısser Aıjan Qasymbek). Al «Erekshe oqıǵa» konkýrstan tys baǵdarlamasy bolgar rejısseri, ulttyq baıqaýdyń qazylar alqasynyń múshesi Mılko Lazarovtyń «Aga» kartınasymen ashyldy.
ALMATY
