Ulttyq bank basshysy Pirmatov depýtattyń saýalyna bergen jaýabynda otandyq ekonomıkadaǵy aqshanyń qunsyzdanýynyń basty ólshemi valıýta baǵamy emes, eldegi ınflıasııa deńgeıi ekenin, zeınetaqy aktıvterin ınvestısııalaýdyń negizgi maqsaty uzaq merzimdi perspektıvada ınflıasııa deńgeıinen joǵary tabys alý ekenin aıtty.
«Makroekonomıkalyq jaǵdaıdyń qıyndyǵyna qaramastan, bıylǵy jyldyń basynan beri BJZQ zeınetaqy aktıvteriniń kiristiligi oń boldy. Bul rette tutastaı alǵanda, BJZQ-da zeınetaqy aktıvterin shoǵyrlandyrýdan keıingi kezeńde (2014 jylǵy sáýir – 2022 jylǵy qarasha) jınaqtalǵan ınflıasııa 111,2 paıyzǵa, zeınetaqy aktıvteriniń jıyntyq kiristiligi 114,2 paıyzǵa jetti. Osylaısha, belgili bir qysqa merzimde alynǵan kiristilik negizinde jasalǵan BJZQ zeınetaqy aktıvterin basqarýdyń tıimsizdigi týraly tujyrymdar durys emes», dedi Pirmatov.
Ol jınaqtaýshy zeınetaqy júıesiniń turaqtylyǵy turǵysynan tabystylyq pen ınflıasııa kórsetkishterin uzaq ýaqyt kókjıegi boıynsha qarastyrǵan oryndy dep túsindirdi.
Ulttyq bank basshysy qarjylyq retteýshiniń BJZQ zeınetaqy aktıvterin qalaı jáne qaıda ınvestısııalaıtyny týraly da aıtty.
«Ulttyq banktiń ınvestısııalyq saıasaty valıýtalar, elder, sektorlar men emıtentter boıynsha qarjy quraldarynyń ártúrli túrlerine ınvestısııalaýdy kózdeıdi. BJZQ zeınetaqy aktıvteri tek naryq jaǵdaıynda ınvestısııalanady, bul salymshylardyń zeınetaqy jınaqtarynyń ádil qaıtarylýyn qamtamasyz etedi», dedi ol.
Ulttyq bank basshysy jergilikti naryqtaǵy zeınetaqy aktıvteriniń negizgi bóligi senimdi emıtentterdiń: Qarjy mınıstrliginiń, kvazımemlekettik kompanııalardyń jáne halyqaralyq qarjy uıymdarynyń baǵaly qaǵazdaryna ınvestısııalanǵanyn qosty. Bul BJZQ zeınetaqy aktıvteriniń saqtalýy men tabystylyǵyn qamtamasyz etedi. Zeınetaqy aktıvteriniń bir bóligi qarjy quraldarynyń geografııasy men tizimin keńeıtý, sondaı-aq portfeldiń sapasyn, ótimdiligin jáne uzaq merzimdi tabystylyǵyn arttyrý úshin syrtqy naryqtarǵa ınvestısııalanady.
Bul rette teńgede nomınasııalanǵan qarjy quraldarynyń aǵymdaǵy úlesi shetel valıýtasyndaǵy zeınetaqy aktıvteriniń jalpy kóleminiń 71,5 paıyz – 28,5 paıyzy deńgeıinde.
«BJZQ zeınetaqy aktıvteriniń valıýtalyq bóligin tıimdi ınvestısııalaý maqsatynda táýekel men tabystylyqtyń ońtaıly araqatynasyn qamtamasyz etetin jańa strategııalyq bólý ázirlendi. Valıýtalyq aktıvterdi basqarý ındekstik negizde júzege asyrylady, ol halyqaralyq tájirıbede keńinen qoldanylady jáne jahandyq aksııalar, damyǵan jáne damýshy elderdiń oblıgasııalary, ınvestısııalyq deńgeıdegi emıtentterdiń korporatıvtik oblıgasııalary sııaqty sheteldik aktıvterdiń negizgi synyptaryna ınvestısııalaýdy kózdeıdi», dedi Ǵalymjan Pirmatov.
