«Munaı óndirý salasynda elimizdiń úsh negizgi ken ornynda iri jobalardy iske asyrý boıynsha jumystar jalǵasýda. Teńiz ken ornynda munaı óndirýdi jylyna 12 mln tonnaǵa ulǵaıtýǵa múmkindik beretin Bolashaq keńeıtý jobasy iske asyrylýda. 2022 jyldyń qorytyndysy boıynsha joba boıynsha jumystardyń jalpy ilgerileýi 95,2%-dy qurady, jobany aıaqtaý 2024 jyly josparlanyp otyr. 2023 jyly Teńizde Saǵalyq qysymdy basqarý jobasy aıaqtalady, ol bolashaq keńeıtý jobasy aıaqtalǵan kezde ken ornynda jumys isteıtin zaýyttardyń óńdeý qýattarynyń tolyq júktelýin qamtamasyz etedi», dedi mınıstr.
Onyń aıtýynsha, Qarashyǵanaq ken ornynda gazdy keri aıdaýdyń tórtinshi kompressory iske qosylǵan. Sondaı-aq quny shamamen 1 mlrd dollardy quraıtyn besinshi kompressordy iske asyrý bastaldy, 735 mln dollar somasyna 6-shy kompressordy salý boıynsha túpkilikti ınvestısııalyq sheshim qabyldandy. Bul jobalar óndirý kólemin jylyna 10-11 mln tonna deńgeıinde ustap turýǵa baǵyttalǵan.
Qashaǵan ken ornynda qýattylyǵy jylyna 1 mlrd tekshe metr ilespe gazdy qaıta óńdeý boıynsha jobany iske asyrý bastaldy. Munaı men gaz kondensatyn esepke alýdyń aqparattyq júıesi iske qosyldy, ol munaı aınalymynyń 95%-yn baqylaýǵa múmkindik beredi.
Mınıstr joǵaryda atalǵan jobalardyń el ekonomıkasy úshin tıimdiligin arttyrý maqsatynda Memleket basshysynyń tapsyrmasy boıynsha 2023 jyly sheteldik áriptestermen birlesip iri munaı-gaz jobalaryn damytýdyń keshendi jospary ázirlenetinin atap ótti.
