3 qańtar kúni keshkisin reıd barysynda Qyzyljar aýdanynda Sokolovka poselkelik polısııa bólimshesiniń qyzmetkerleri tekserý úshin Mitsubishi Montero jol talǵamaıtyn kóligin toqtatqan. Kólik salonynda Petropavl qalasynyń 41 jáne 38 jastaǵy turǵyndary bolǵan. Polısııa qyzmetkerleri artqy esikke juqqan qandy baıqap qalady.
Salonnan arnaıy qapshyqqa salynǵan 12-shi kalıbrli «ATA-ARMS» tegis uńǵyly qarý men janýarlardyń eti salynǵan sómke tabyldy. Qujattardy tekserý kezinde er adamdar ań aýlaýǵa shyqqany, olarda bir qoıandy atýǵa ǵana arnalǵan ruqsat qaǵazy bary belgili boldy.
– Shaqyrý boıynsha kelgen jedel-tergeý toby 3 sibir eliginiń zańsyz atylǵan jerin anyqtady. Atalǵan fakti QR Qylmystyq kodeksiniń 337-baby (Zańsyz ańshylyq) boıynsha sotqa deıingi tergep-tekserýlerdiń biryńǵaı tiziliminde tirkeldi. Qarý, oq-dári, janýarlardyń eti tárkilendi, – dedi aýdandyq polısııa bóliminiń bastyǵy Álıhan Baıqadamov.
Oblysta ótken jyly zańsyz ańshylyqtyń jalpy 19 faktisi tirkeldi.
