Aldymen Oqý-aǵartý mınıstri Ǵanı Beısembaev baıandama jasady. Ol 2022 jyldyń jumys qorytyndylaryna toqtalyp, 2023 jylǵa arnalǵan josparlar týraly aıtty. Mınıstr bıyl bilim berý uıymdarynda qaýipsizdikti qamtamasyz etýge, tárbıeshilerdiń mártebesin arttyrýǵa, apatty jáne úshaýysymdy mektepterdi joıýǵa erekshe nazar aýdarylatynyn, orta bilim berý standarty men úlgilik oqý baǵdarlamalaryn ózgertý, aǵylshyn tilin oqytý saǵattaryn ulǵaıtý boıynsha jumystar jalǵastyrylatynyn atap ótti.
Elimizdiń barlyq óńirinde 1-4 synyp oqýshysynyń barlyǵyn ystyq tamaqpen qamtamasyz etý jumystary júrgiziledi.
Ǵanı Beısembaev kolledj stýdentteri úshin jaqsy jańalyqpen bólisti. Basqa óńirden kelgen stýdentterge demalys ýaqytynda jol aqysy rastaıtyn qujattarsyz tólenetin boldy. Tólemder mólsheri - 4 AEK.
Onymen qosa 2022 jyly mektepke deıingi tárbıe men oqytýdyń jańa modeli qabyldandy. Sondaı-aq oqý baǵdarlamalary, josparlary jáne oqytý ádisteri qaıta qaraldy.
Bilim berý uıymdarynyń birinshi basshylaryn rotasııalaý tájirıbesi engizildi. Búgingi tańda 514 mektep dırektory men 447 balabaqsha meńgerýshisi rotasııalandy.
2022 jyly muǵalimderdiń jalaqysy taǵy 25%-ǵa ósti. Sondaı-aq muǵalimderdiń 63%-y (216 989) attestasııa qorytyndysy boıynsha qosymsha aqy alady.
Endi 30 jyl pedagogıkalyq ótili bar jáne zeınetkerlik jasqa jaqyndaǵan muǵalimder testileýden bosatylady. Muǵalimderdi testileýdiń shekti deńgeıi de 50%-ǵa tómendetildi. Muǵalimderdiń biliktiligin arttyrý kýrstarynyń jıiligi 5 jyldan 3 jylǵa deıin qysqardy.
Sonymen qatar mınıstrlik 2022 jyly daryndy balalardy damytý men qoldaýǵa erekshe kóńil bóldi. Memleket basshysynyń tapsyrmasy boıynsha halyqaralyq olımpıada jeńimpazdary tarıhta alǵash ret aqshalaı syılyqtarǵa ıe boldy.
«2022 jyly 27 jeńimpaz jáne 26 muǵalim 73 mln teńgeden astam syıaqy aldy. Sonymen qatar halyqaralyq zııatkerlik, shyǵarmashylyq, sporttyq olımpıadalardyń 80 jeńimpazy men júldegeri alǵash ret joǵary oqý oryndarynda oqý úshin grantqa ıe boldy. 421 bala «Daryn», RFMSh, «Bilim-Innovasııa» lıseılerinde oqýǵa múmkindik aldy», dedi mınıstr Ǵanı Beısembaev.
Sondaı-aq 2022 jyly elimizde 136 myń oryndyq 247 jańa mektep salyndy. Aldaǵy ýaqytta oqýshylar ornynyń tapshylyǵyn joıýǵa múmkindik beretin «Jaıly mektep» aýqymdy jobasy júzege asyrylady.
«Sońǵy 10 jylda oqýshylar sany 1 mln-ǵa ósip, 3,7 mln-ǵa jetti. Bul óte jaqsy kórsetkish. Infraqurylym máselesin sheshý úshin 2023-2025 jyldar aralyǵynda respýblıkalyq bıýdjetten 842 myń oqýshyǵa arnalǵan 401 mekteptiń qurylysyna 2,6 trln teńge bólindi», dep aıtty Oqý-aǵartý birinshi vıse-mınıstri Sholpan Karınova.
Aıta ketsek, kolledjde oqýǵa bólingen granttar sany 45 myńǵa ósti. Barlyǵy 125 myń stýdent oqýǵa múmkindik aldy. Bul rette áleýmettik osal toptaǵy balalardyń grant alý múmkindigi artty.
Kolledjderge akademııalyq erkindik berildi. Endi kolledjder jumys berýshilermen birlesip, bilim berý baǵdarlamalarynyń mazmuny men oqý merzimin anyqtaı alady. Oqý kezinde stýdenttege 3 biliktilikke deıin alýǵa múmkindik berildi.
2022 jyl «Balalar jyly» bolyp jarııalanǵan edi. Sol sebepti bilim berý uıymdarynyń qaýipsizdigin qamtamasyz etý máselesi erekshe baqylaýǵa alyndy. Balalarǵa qatygezdik kórsetýdiń (býllıng) aldyn alý erejesi men bilim berý obektilerin terrorızmge qarsy qorǵaýdy uıymdastyrý jónindegi nusqaýlyq kúshine endi.
«Bıyl ata-anasynyń qamqorlyǵynsyz qalǵan árbir bala balalar úıine barmaı-aq otbasynda tárbıelenýi úshin kásibı qabyldaýshy otbasylar ınstıtýtyn zańdastyrý qajet. Ol úshin mınıstrlik kásibı qabyldaýshy otbasylardy qurý tártibin, kásibı qabyldaýshy ata-analarǵa qoıylatyn talaptardy jáne áleýmettik kepildikterdi retteıtin zań jobasyn ázirleýdi jedeldetýi kerek. Balalar úılerin balalardy qoldaý ortalyǵyna transformasııalaý úderisin jedeldetý qajet», dedi Premer-mınıstrdiń orynbasary Altaı Kólginov.
Qazaqstanda sońǵy úsh jylda jetim balalarǵa arnalǵan uıymdardyń sany 14-ke qysqarǵanyn aıta ketý kerek. 22 myń jetim balanyń 80%-y qazirdiń ózinde otbasynda tárbıelenip jatyr.
2023 jyly Oqý-aǵartý mınıstrligi muǵalimderdiń, tárbıeshilerdiń jáne bilim berý salasynyń basqa da qyzmetkerleriniń mártebesin kóterý jáne jalaqysyn arttyrý boıynsha jumysty jalǵastyrady.
Sonymen birge 2023 jyly bilim berý uıymdarynyń pedagog-psıhologtarynyń, áleýmettik pedagogteriniń, kitaphanashylarynyń jalaqysyn kóterý máselesi de pysyqtalady.
