Jalpy, bizdiń keıipkerimizdi san qyrly talant ıesi dep aıtýǵa bolady. О́ıtkeni halqymyz Gúlfaırýzdy aktrısa retinde de jaqsy biledi. «Alastalǵan Alıtet», «Botakóz», «Qyz Jibek» sekildi birqatar fılmderge túsip, tamasha talantymen ǵana emes, asqan sulýlyǵymen de kórermen kózaıymyna aınaldy. Alaıda onyń ónerdegi juldyzy beıneleý ónerinde jandy. Joǵary oqý ornyn bitirgennen keıin eki-úsh jyl Almaty kórkemsýret ýchılıshesinde sabaq berdi. Odan soń qazirgi Abaı atyndaǵy Qazaq memlekettik akademııalyq opera jáne balet teatrynda bas sýretshi bolyp istedi. Osy jyldary ol birqatar opera jáne balet qoıylymdaryn kórkem bezendirdi. Sahna kostıýmderiniń eskızin jasady. Ásirese syrshyl sýretkerdiń qylqalamynan týǵan qazaq qyzdarynyń ǵajaıyp portretteri birinen-biri ótedi. Sonyń ishinde Kúlásh Baıseıitova, Sholpan Jandarbekova, Bıbigúl Tólegenova sekildi qazaq ónerinde aıshyqty orny bar biregeılerimizdiń beınesin shynaıy somdaǵan. Biz búgin osy týyndylar arasynan ataqty bıshi Shara Jıenqulovany salǵan «Qazaq valsi» atty kartınasyn sóz etsek deımiz. Qazaq bı óneriniń hanshaıymy atanǵan Shara apamyz 1936 jyly Máskeýde ótken Qazaq ádebıeti men óneriniń onkúndiginde ulttyq bıimen ózge jurtty tańǵaldyrǵan. 1938 jyly qazaqtyń tuńǵysh baleti «Qalqaman – Mamyr» qoıylymyndaǵy basty keıipker Mamyrdyń partııasyn oryndady. Odan keıin baletmeıster L.A.Jýkovpen birlesip, 1940 jyly I.N.Nadırovtyń «Kóktem» baletin sahnalady. Sondaı-aq talantty tulǵa ulttyq bı ónerin ǵylymı turǵyda zerttep, oǵan jańa tynys berdi. Osyndaı daryn ıesiniń beınesin salý sýretshige ońaı bolmaǵany anyq. Ony týyndyger óz esteliginde aıtady.
«Lenıngradtaǵy I.E.Repın atyndaǵy keskindeme, músin jáne sáýlet ınstıtýtyn bitirip, Almatydaǵy Abaı atyndaǵy opera jáne balet teatryna bas sýretshi bolyp ornalastym. Ol kezde Shara apaıdyń jasy qyryqtan asyp ketken. Biraq halqymyzdyń «Syrly aıaqtyń syry ketse de, syny ketpeıdi» degen sózi bar emes pe, ol kisi sol kezde de sulý bolatyn. Bul jumysym – qazaq qyzdary portretterinen turatyn galereıamnyń alǵashqysy. Osy eńbegimdi salý kezinde qys qatty boldy. Biz bastapqyda Shara apaıdyń úıinde jumys istep júrdik. Biraq úıde jumys isteý qolaısyzdyq týdyrdy. Bir jaǵynan, qajetti qural-jabdyqtardy úıge tolyq ákele almaımyn. Al sheberhananyń ishi sýyq. Sonda da oǵan sheberhanada jumys isteý týraly usynysymdy uıala jetkizdim. Birden kelisip, sheberhanaǵa keldi. Apaı «óner qurbandyqty talap etedi» dep, ústinde juqa kóılek bolsa da sýyqqa shydap otyrdy. Qazir osyndaı jaǵdaıda jumys isteýge bireý keliser me edi? Aıta almaımyn. Shara apaıdyń júzi óte jyly edi. Portretti salýǵa bir jyl ýaqyt ketti. Keıde ol kisi: «Ájimderim kórinip qalmasyn» dep qaljyńdap qoıatyn. Kartınanyń sońǵy shtrıhyn salý kezinde ony baıqamaı búldirip aldym. Úıimiz jaqyn bolǵandyqtan júgirip Shara apaıǵa keldim. Eshqandaı qabaq shytpastan sheberhanama kelip, jumysymdy aıaqtaýyma múmkindik berdi. Qysqasy, osy eńbegimniń Shara apaıǵa unaǵany sonshalyq, ol kisi «men halqymnyń júreginde osy beınemmen qalamyn» dep rızashylyǵyn bildirdi».
Bul kartına 1958 jyly Máskeýde búkilodaqtyq komsomol kórmesine qoıyldy. Odan keıin «Ogonek», «Iskýsstvo» jáne taǵy basqa birneshe odaq kóleminde jaryq kóretin jýrnaldarǵa basylyp, el arasyna keń taraldy.
Kórnekti keskindemeshi kózi tirisinde belgili qalamger, ǵalym Saýytbek Abdrahmanovqa bergen suhbatynda: «Men qazaq áıeliniń ózindik bólek beınesin, onyń jan sulýlyǵyn, tán sulýlyǵyn, júreginiń daladaı darqandyǵyn, seziminiń sonshalyqty náziktigin kórsetýdi óz ómirimniń mán-maqsaty retinde ustanyp kele jatqan adammyn. Qazaq qyzdarynyń jan jomarttyǵyn men ómirimniń qıyn jyldarynda da óz kózimmen kóre aldym» depti. (Abdrahmanov S. «О́ner ólkesi» 456-bet).
Qazaqstannyń halyq sýretshisi Gúlfaırýz Ismaıylova «Qazaq valsin» – «shyǵarmashylyǵymdaǵy eń úzdik týyndym» dep baǵalapty. Avtor ony beker aıtpaǵan bolar. Shabytty kóńil kúıden týǵan kartına áli de talaı urpaqty tańdaı qaqtyryp turady.
