«El tarıhynda qazaq halqynyń taǵdyryna qaýip tóndiretin qıynshylyqtar men zulmattar kóp boldy. Qazaq halqyn joıýǵa baǵyttalǵan osyndaı sumdyq áreketterdiń biri – Keńes ókimeti tusynda ádeıi uıymdastyrylǵan asharshylyq pen qazaq qaıratkerleriniń jazyqsyz jer aýdarylýy. Dál osy surapyl jyldardy este qaldyrý jáne sabaq alý maqsatynda 31 mamyr asharshylyq jáne saıası qýǵyn-súrgin qurbandaryn eske alý kúni bolyp jarııalandy», dedi Amanjol Altaı Májilistiń jalpy otyrysynda.
Degenmen, depýtat atap ótkendeı, qazaqstandyqtardyń qazir «kórnekti qaıratkerlerdiń esimderin eske alyp, mıllıondaǵan adamdardyń sumdyq taǵdyryn oı eleginen ótkizip» laıyqty qurmet kórsetýge múmkindigi joq. Depýtat bul kúni azamattar tarapynan qýǵyn-súrgin qurbandaryna taǵzym etý eskertkishter men memorıaldarǵa gúl shoqtaryn qoıýdan ári ketpeıtinin basa aıtty.
«2022 jyldyń 12 tamyzyndaǵy 363−buıryǵyna sáıkes jalpy bilim beretin mektepterde 36-shy oqý aptasy 31 mamyrda aıaqtalady. Mektepterdegi sońǵy qońyraý kúnin 30 mamyrǵa, tipti 1 maýsymǵa aýystyrý kerek. Bul eshqandaı talqylaýǵa shydamaıtyn ádil talap», dedi Májilis depýtaty.
A. Altaıdyń pikirinshe, mynandaı sharalardy qoldaný qajet:
- dástúrli túrde Saıası qýǵyn-súrgin jáne asharshylyq qurbandaryn eske alý kúnine bir mınýt únsizdik jarııalaý;
- bul kúni telearnalardan sol kezdegi oqıǵalar týraly mazmundy baǵdarlamalarmen almastyryp, ázil-ysqaq shoý baǵdarlamalar men estradalyq konsertterdi bermeý;
- BAQ betterinde aıtýly datanyń tarıhı salmaǵyn, ǵıbratty mánin jan-jaqty jetkizetin maqalalar jarııalaý;
- mektepterdegi sońǵy qońyraý kúnin 31 mamyrǵa aýystyrý.
