Sýretti túsirgen Igor BÝRGANDINOV
Sessııa barysynda Aqparat jáne qoǵamdyq damý mınıstrligi Aqparat komıtetiniń tóraǵasy Qanat Ysqaqov, «Qazaq gazetteri» JShS-nyń dırektory Dıhan Qamzabekuly, National Geographic Qazaqstan jýrnalynyń jaýapty redaktory Aıbyn Shaǵalaq, «Aıqyn-Lıter» JShS-nyń dırektory Ysqaq Egemberdıev, jýrnalıst Erbolat Muhamedjan óz oılaryn ortaǵa salyp, túrli suraqtarǵa jaýap berdi.
«Qazaq gazetteri» JShS-nyń dırektory Dıhan Qamzabekuly aımaqtaǵy jáne repýblıkalyq deńgeıdegi BAQ arasyndaǵy baılanysty nyǵaıtý keregin aıtty.
«Bul jıynnyń mańyzyn bárimiz de túsinip otyrmyz. О́ıtkeni bizdiń túsinigimizde aqparat ortalyq, jekemenshik nemese óńirlik dep bólinbeıdi. Bul bárimizge ortaq. Quryp jatqanymyz bir memleket. Qalyptastyryp jatqanymyz bir qoǵam. Sol qoǵamnyń, memlekettiń máselesine siz ben biz altyn kópirmiz. Halyq baspasózdi jadynan shyǵara qoıǵan joq. Baspasózge senedi. Baspasózdi qadirleıdi. Hatqa túsken jazýdy shyndyq dep oılaıtyn býyn áli qoǵamymyzdyń negizgi bóligin quraıdy. Osy oraıda memleketshildik oılar, pikirler, memlekettik aqparat saıasaty óńirde qalaı kórinip jatyr degen sekildi aımaqtyń barlyq máselesin bilemiz dep aıta almaımyz. Ony búgingi forýmda sizderdiń sózderińizden jáne oılaryńyzdan bilgimiz keledi. Ekinshi «Egemen Qazaqstan» jáne «Kazahstanskaıa pravda» sekildi basqa da jetekshi basylymdar men óńirlik basylymdardyń baılanysy qandaı bolýy kerek? Bir-birimizden úırenetin nemese qazirgi maman daıarlaıtyn kezeńde biz qandaı ustanymdy alǵa tartýymyz kerek? Sol týraly da búgingi basqosýda aqyldasqan jón. Aqparattyń negizgi úsh fýnksııasyn bilesizder. Birinshisi – aqparatty jetkizý qyzmeti, ekinshisi – oqıǵaǵa túsinik berý qyzmeti, úshinshisi – alynǵan aqparatqa qoǵamnyń kózqarasy jáne zerdeleý qyzmeti. Qoǵamnyń aqparat salasyndaǵy osy «úsh qaınaýy» bizdi biriktiretin jáne qoǵam aldyndaǵy bedelimizdi arttyratyn qyzmet dep oılaımyn. Búginde jıi aıtylyp júrgen jýrnalıstiń mártebesi degen dúnıe osydan týyndaıdy», dedi Dıhan Qamzabekuly.
Sondaı-aq spıker jýrnalısterge degen kózqarastyń ózgeriske ushyraǵanyn da atap ótti.
– «Jýrnalıst – tek qana sensasııa qýatyn adamdar» degen de kózqarastar bar. «Jýrnalıst – jalqaý. Tek baspaóz hatshylarynyń jibergen dúnıesinen materıal jasaıdy» degen de sózder aıtylady. «Jýrnalıst óz kózimen kórmeı, bireýden estigenin jazady» degen de kózqaras tanytatyndar bar. Biraq bul da qoǵamnyń syny. Syndy da durys qabyldaýymyz qajet. Sebebi áý basta BAQ-ta syn men baqylaý bolatyn. Gazet synaıdy. Soǵan tıisinshe atqarýshy bılik nemese belgili bir qoǵamdyq sala qurylymdar odan qorytyndy shyǵarady. Bul qazir qalaı júrip jatyr. Baıqap tursaq, synalmaı jatqan adam joq. Konstrýktıvti syn da jazylyp jatyr. Qazaq baspasózinde mádenıetti syn qalyptasqan. Buǵan reaksııa qalaı bolyp jatyr? Ol da bir oılandyratyn nárse. Búgingi aqparatty qansha adam jáne kimder oqyp jatyr? Gazet oqyla ma? Ásirese zııaly qaýym, atqarýshy bıliktegi azamattar tańdy gazet materıalyn oqýmen bastaı ma, joq álde «qurǵaq» aqparatty jedeldetip ótkize sala ma? Joq álde analıtıkalyq materıaldy, janyn berip jazǵan jýrnalısterdiń maqalasyn oqı ma? Mine, qoǵammen aradaǵy baılanystyń alshaqtyǵy, qoǵam men bıliktiń arasyndaǵy alshaqtyq, jalpy aqparattyń adamǵa jetýindegi alshaqtyq osyndaı dúnıelerdi kórsetedi, – dedi «Qazaq gazetteri» JShS-nyń dırektory.
Sondaı-aq Dıhan Qamzabekuly basylym materıaldaryna jasalatyn baqylaý týraly aıtyp ótti. Onyń aıtýynsha, aqparat shynaıy jáne birjaqty bolmaýy kerek.
