Sapar aıasynda Ulybrıtanııanyń Syrtqy ister jáne halyqaralyq damý mınıstrliginiń basshylyǵymen, Mınıstrler kabınetiniń joǵary laýazymdy tulǵalarymen, Parlament komıtetteriniń tóraǵalarymen, Qazaqstanmen yntymaqtastyq jónindegi parlamenttik toptyń múshelerimen, Qazaqstan-Brıtan qoǵamynyń tóraǵasymen, sondaı-aq isker toptardyń ókilderimen kezdesýler ótkizildi. Kelissózder barysynda ekijaqty saıası, saýda-ekonomıkalyq, mádenı-gýmanıtarlyq yntymaqtastyqtyń qazirgi jaǵdaıy, sondaı-aq halyqaralyq damýdyń ózekti máseleleri talqylandy.
Ulybrıtanııanyń taldaý ortalyqtarynyń ókilderimen jeke keńeıtilgen kezdesý sheńberinde qazaqstandyq-brıtan yntymaqtastyǵynyń perspektıvalary jáne halyqaralyq pen óńirlik kún tártibi máseleleri boıynsha jan-jaqty pikir almasyldy.
E. Qazyhan Astana men London arasyndaǵy áriptestikti nyǵaıtýdyń mańyzdylyǵyn jáne saýda-ınvestısııalyq saladaǵy yntymaqtastyqty arttyrýdyń eleýli áleýetin atap ótti. Prezıdenttiń arnaýly ókili Forın-ofıs basshylyǵyna, brıtan Parlamentiniń músheleri men saraptamalyq qoǵamdastyq ókilderine QR Prezıdenti Qasym-Jomart Toqaevtyń bastamasymen Qazaqstandaǵy aýqymdy saıası jáne ekonomıkalyq ózgeristerdiń iske asyrylý barysy týraly aqparatty jetkizdi.
О́z kezeginde, brıtan tarapy Qazaqstan Ulybrıtanııanyń Ortalyq Azııadaǵy negizgi jáne strategııalyq áriptesi ekenin atap ótip, Qazaqstan-Ulybrıtanııa yntymaqtastyǵyn odan ári nyǵaıtýǵa nıet bildirdi. Sonymen qatar brıtan úkimeti men parlament ókilderi Memleket basshysynyń reformalar baǵytyna qoldaý bildirip, Qazaqstandaǵy saıası jańǵyrýdyń ýaqyttylyǵy men ózektiligin atap ótti.
Sapar qorytyndysy boıynsha taraptar ekijaqty baılanystardy joǵary deńgeıde jalǵastyrýǵa kelisti.
